سکرات موت میں پانی کا خواب

یوں مری قبر بنا جیسے شبستان نشاط

موت کا جشن منا

فرش شبنم پہ بچھا لال گلابوں کی بساط

خالی طاقوں پہ سجا زرد شرابوں کے ظروف

وا دریچوں پہ بصد ناز و ادا ٹانکنے آ

بھینی خوشبو کے دھنک رنگ حریری پردے

ابھی کچھ دیر ٹھہر بانو ابھی دف نہ بجا

نہ اٹھا سوئی ہوئی کلیوں کے گھونگٹ نہ اٹھا

موت اگر جشن ملاقات ہے آ جشن منا

اک ستارے کو جنم دے

اک ستارہ کہ جو اس موت کی شب رقص کرے

موت اور رقص

نیند میں بھیگی ہوئی پلکوں پہ بیدار جلال

دور اک جنگ زدہ دشت میں تصویر جمال

سینۂ خاک پہ کوہوں کا تراشیدہ کمال

آ مری بانہوں میں لہرا کے چلی آ بانو

روشنی بجھ گئی جلنے لگے بدنوں کے حصار

دور کافور کی ٹھنڈک میں کھڑے ہیں اشجار

خشک ہے میرا گلا خالی ہے پانی کا گلاس

اپنے اشکوں سے مری پیاس بجھا

آ مری قبر بنا