saloni sardiyon ki nazm

purāne boot haiñ tasme khule haiñ

abhī miTTī ke chehre un-dhule haiñ

sharābeñ aur mashkīza sahar kā

abhī hai jism pākīza gajar kā

sute chehre pe istehzā kā mausam

lahū nabzoñ se ḳhālī kar gayā hai

gale meñ mulk ke ta.avīz Daalo

bidesī barchhiyoñ se Dar gayā hai

ġhazal dālān meñ rakkhī hai maiñ ne

mahak hai sañgtare kī qaash jaisī

ye kaisī mai hai jo chakkhī hai maiñ ne

mujhe ushshāq ye kahte haiñ 'āmir'

bahut tanhā sisakte dahr meñ ho!

baḌe shā.er ho chhoTe shahr meñ ho

fareb-e-asr se mad.hosh kamrā

nigoḌī titliyoñ se bhar gayā hai

samundar piñDliyoñ tak aate aate

kisī patthar kī sil par mar gayā hai

salonī sardiyoñ se jhāñkte haiñ

vo abrū kashtiyoñ ko hāñkte haiñ

sileTī bādaloñ kā ye sahīfa

mirī muTThī meñ paḌhtā hai vazīfa

maiñ rotā huuñ to ro paḌte haiñ taa.ir

mire hujre meñ kam aate haiñ zaa.er

ye poreñ nūr-bāfī kar rahī haiñ

mohabbat ko ġhilāfī kar rahī haiñ

tafāḳhur meñ hai do hoñToñ kā ḳham bhī

abhī rakkhā nahīñ maiñ ne qalam bhī

purane boot hain tasme khule hain

abhi miTTi ke chehre un-dhule hain

sharaben aur mashkiza sahar ka

abhi hai jism pakiza gajar ka

sute chehre pe istehza ka mausam

lahu nabzon se KHali kar gaya hai

gale mein mulk ke tawiz Dalo

bidesi barchhiyon se Dar gaya hai

ghazal dalan mein rakkhi hai main ne

mahak hai sangtare ki qash jaisi

ye kaisi mai hai jo chakkhi hai main ne

mujhe ushshaq ye kahte hain 'amir'

bahut tanha sisakte dahr mein ho!

baDe shaer ho chhoTe shahr mein ho

fareb-e-asr se madhosh kamra

nigoDi titliyon se bhar gaya hai

samundar pinDliyon tak aate aate

kisi patthar ki sil par mar gaya hai

saloni sardiyon se jhankte hain

wo abru kashtiyon ko hankte hain

sileTi baadalon ka ye sahifa

meri muTThi mein paDhta hai wazifa

main rota hun to ro paDte hain tair

mere hujre mein kam aate hain zaer

ye poren nur-bafi kar rahi hain

mohabbat ko ghilafi kar rahi hain

tafaKHur mein hai do honTon ka KHam bhi

abhi rakkha nahin main ne qalam bhi