samar-farosh

samar-farosh kī nigāh-e-dūrbīn meñ

añdherā darmiyān se phaTā

bahut se sabz-posh the

ki jin kā reshmīñ labāda surḳh thā

gul-e-anār surḳh hoñToñ se ziyāda surḳh thā

pake hue phaloñ kī ḳhushbueñ thiiñ mujtama'

ghulī na thī abhī ahāta-e-siyāh meñ havā

pake hue phaloñ bharī mahak abhī uḌī na thī

maqām-e-muttasil se be-ḳhabar

naqāb-dar-naqāb muḳhtasar sī ek bel

thī chhupī huī

dulhan kī tarh apne aap meñ

abhī hile nahīñ haiñ shāḳhche

larzanī hai abhī navā-e-ḳhush mo.azzin-e-javān kī

abhī tuyūr tak ḳhamosh haiñ

na jo kisī bhī zū-funūn samt se baḌhe

na jo kisī ke taaza jism-o-jān se uThe

dabīz ḳhāmushī meñ boltā

dabīz ḳhāmushī ko chīrtā sarosh hai

chhiḌak diyā kisī ne āb-e-zarfishān jhunD par

chamak uThā safed din

khulā samar-farosh ḳhushbuoñ meñ band baaġh dekh kar

hazār rangoñ vaalī titliyāñ

jo ik nahīf shāḳhche se lag ke so rahī thiiñ

jāgne lagīñ

suhāganeñ darūn toḌtī

damakte ḳhvāb ko tyāgne lagīñ

siyāh bādaloñ kī narm aur mahīn chādaroñ se

baaġh Dhāñpne lagīñ

samar-farosh kī nigāh-e-dūrbīn

samar-farosh ki nigah-e-durbin mein

andhera darmiyan se phaTa

bahut se sabz-posh the

ki jin ka reshmin labaada surKH tha

gul-e-anar surKH honTon se ziyaada surKH tha

pake hue phalon ki KHushbuen thin mujtama'

ghuli na thi abhi ahata-e-siyah mein hawa

pake hue phalon bhari mahak abhi uDi na thi

maqam-e-muttasil se be-KHabar

naqab-dar-naqab muKHtasar si ek bel

thi chhupi hui

dulhan ki tarh apne aap mein

abhi hile nahin hain shaKHche

larzani hai abhi nawa-e-KHush moazzin-e-jawan ki

abhi tuyur tak KHamosh hain

na jo kisi bhi zu-funun samt se baDhe

na jo kisi ke taza jism-o-jaan se uThe

dabiz KHamushi mein bolta

dabiz KHamushi ko chirta sarosh hai

chhiDak diya kisi ne aab-e-zarfishan jhunD par

chamak uTha safed din

khula samar-farosh KHushbuon mein band bagh dekh kar

hazar rangon wali titliyan

jo ek nahif shaKHche se lag ke so rahi thin

jagne lagin

suhaganen darun toDti

damakte KHwab ko tyagne lagin

siyah baadalon ki narm aur mahin chadaron se

bagh Dhanpne lagin

samar-farosh ki nigah-e-durbin