samay ho gaya

phir maqām-e-rifāqat pe mudġham huiiñ

sūiyāñ donoñ ghaḌiyāl kī

raft o aamad ke chakkar meñ

ghanTe kī āvāz meñ

merā dil kho gayā

apnī Tik-Tik meñ

bahtā rahā vaqt

kitnā samay ho gayā!

sāl-hā-sāl

paanī ke chashme se

giile kiye lab anāsir ne

jalte alaav pe

haath apne taape mazāhir ne

siine kī dhaḌkan se

nā-dīd ke rañg-o-roġhan se

ashyā ne

bīnā.ī hāsil kī

maqsūm ke tāqche se

jahāñ phuul rakkhe the

lakḌī ke sandūqche se

ḳhazāna uThā le ga.ī raat

muTThī se girte rahe

ret kī misl din!

ek din

sehn kī pīl-gūñ dhuup meñ

āhanī chārpā.ī pe leTe hue

ek jhapkī sī aa.ī

to maiñ so gayā

mere chehre pe

bārish kī ik buuñd ne

gar ke dastak dii:

baabā chalo,

apne kamre ke andar

samay ho gayā

phir maqam-e-rifaqat pe mudgham huin

suiyan donon ghaDiyal ki

raft o aamad ke chakkar mein

ghanTe ki aawaz mein

mera dil kho gaya

apni Tik-Tik mein

bahta raha waqt

kitna samay ho gaya!

sal-ha-sal

pani ke chashme se

gile kiye lab anasir ne

jalte alaw pe

hath apne tape mazahir ne

sine ki dhaDkan se

na-did ke rang-o-roghan se

ashya ne

binai hasil ki

maqsum ke taqche se

jahan phul rakkhe the

lakDi ke sanduqche se

KHazana uTha le gai raat

muTThi se girte rahe

ret ki misl din!

ek din

sehn ki pil-gun dhup mein

aahani chaarpai pe leTe hue

ek jhapki si aai

to main so gaya

mere chehre pe

barish ki ek bund ne

gar ke dastak di:

baba chalo,

apne kamre ke andar

samay ho gaya