samton ka zawal

jidhar tum ho

usī jānib manāzir aañkh malte haiñ

tumhārī samt hai shahr-e-nigārāñ, chāñd kī nagrī

zamīñ kī god meñ hañstī huī fasloñ kī shādābī

machaltī naddiyoñ kā shor niilī pur-sukūñ jhīleñ

pahāḌoñ par rupahlī dhuup aur peḌoñ kī añgnā.ī

makānoñ ke haram ābādiyoñ ke jāgte manzar

tumhārī samt hai jismoñ kī chāñdī saañs ke mele

diloñ kī dhaḌkaneñ āvāz kī jaltī huī sham.eñ

mirī jānib sulagtī ret taptī dhuup ke sahrā

ghane jañgal haiñ vīrānoñ kī nā-bīnā rifāqat hai

zamīñ hai jis ke āñgan meñ salībeñ īstāda haiñ

ḳhamoshī hai lahū jo chāTtī hai apne zaḳhmoñ kā

mirī jānib shikasta pattharoñ se khelte manzar

safar lambā hai yak-rañgī se ham tum uub jā.eñge

chalo kuchh der chashm-e-shauq ke pahlū badal Dāleñ

jidhar tum ho

usi jaanib manazir aankh malte hain

tumhaari samt hai shahr-e-nigaran, chand ki nagri

zamin ki god mein hansti hui faslon ki shadabi

machalti naddiyon ka shor nili pur-sukun jhilen

pahaDon par rupahli dhup aur peDon ki angnai

makanon ke haram aabaadiyon ke jagte manzar

tumhaari samt hai jismon ki chandi sans ke mele

dilon ki dhaDkanen aawaz ki jalti hui shamen

meri jaanib sulagti ret tapti dhup ke sahra

ghane jangal hain viranon ki na-bina rifaqat hai

zamin hai jis ke aangan mein saliben istada hain

KHamoshi hai lahu jo chaTti hai apne zaKHmon ka

meri jaanib shikasta pattharon se khelte manzar

safar lamba hai yak-rangi se hum tum ub jaenge

chalo kuchh der chashm-e-shauq ke pahlu badal Dalen