samundar agar mere andar aa gire

samundar agar mere andar aa gire

tū pāyāb lahroñ meñ Dhal ke sulagne lage

pyaas ke be-nishāñ dasht meñ

whale machhlī kī sūrat taḌapne lage

horpunoñ se nezoñ se chhalnī badan par

dahaktī huī ret ke tez char ke sahe

aur phir ret par jhaag ke kuchh nishāñ chhoḌ kar

tā-abad sar-burīda se sāhil ke saa.e meñ

hone na hone kī mīThī aziyyat meñ khoyā rahe

ye hone na hone kī mīThī aziyyat bhī kyā hai

nigāheñ uThā.ūñ to hadd-e-nazar tak

azal aur abad ke sutūnoñ pe bārīk sā ek ḳhema tanā hai

na hone kā ye ruup kitnā nayā hai

aur ḳheme ke andar

karoḌoñ sitāroñ kā mela lagā hai

ye hone kā bahrūp lā-intihā hai

mirā jism

resham kā sad-chāk ḳhema

kisī be-karāñ dasht meñ be-sahārā khaḌā hai

magar jab maiñ āñkheñ jhukā.ūñ

to us sard ḳheme ke andar

karoḌoñ taḌapte hue tund zarroñ kā ik dasht phailā huā hai

ye hone na hone kī mīThī aziyyat

ajab mājrā hai

samundar agar mere andar aa gire

tu payab lahron mein Dhal ke sulagne lage

pyas ke be-nishan dasht mein

whale machhli ki surat taDapne lage

horpunon se nezon se chhalni badan par

dahakti hui ret ke tez char ke sahe

aur phir ret par jhag ke kuchh nishan chhoD kar

ta-abad sar-burida se sahil ke sae mein

hone na hone ki miThi aziyyat mein khoya rahe

ye hone na hone ki miThi aziyyat bhi kya hai

nigahen uThaun to hadd-e-nazar tak

azal aur abad ke sutunon pe barik sa ek KHema tana hai

na hone ka ye rup kitna naya hai

aur KHeme ke andar

karoDon sitaron ka mela laga hai

ye hone ka bahrup la-intiha hai

mera jism

resham ka sad-chaak KHema

kisi be-karan dasht mein be-sahaara khaDa hai

magar jab main aankhen jhukaun

to us sard KHeme ke andar

karoDon taDapte hue tund zarron ka ek dasht phaila hua hai

ye hone na hone ki miThi aziyyat

ajab majra hai