samundar ka KHayal

apnī dahlīz pe khaḌā tanhā

apnā ghar ajnabī sā lagtā thā

us kī ruḳhsat thī mānind-e-parvāz

har taraf abtarī kā manzar thā

ek luknat-zada sī vīrānī

dar-o-dīvār pe thī hairānī

larazte aañsū aur dukhtā huā sar

rokte the use paimā.ish-e-vīrānī se

vo ki soyā hai yā ki jaagā hai

sub.h se kyoñ ye samundar kā ḳhayāl zehn meñ aaj thapeḌe maare

kohar-ālūd band darīchoñ meñ

jo vasī.a kā.enāt chhuptī hai

nā-umīdī kī nīlgūñ chādar ek samundar sī phail jaatī hai

kyoñ ye rah rah ke samundar kā ḳhayāl zehn meñ aaj thapeḌe maare

kitnī mānūs thī qarīb thī vo

jaise sāhil ho ik samundar se

be-karāñ mauj jaise sāhil kī god meñ aa ke hī dam letī hai

us kī tasvīr us ke hilte lab

saare manzar haiñ zer-e-āb kahīñ

ik talātum ke baad sarkanDe

jaise pātāl meñ chhup jaate haiñ

kyoñ ye rah rah ke samundar kā ḳhayāl zehn meñ aaj thapeḌe maare

shaam ke dūdhiyā dhuñdlakoñ meñ

tanhā tanhā udaas phirtā hai

raat jab siskiyoñ meñ Dhaltī hai

phir samundar kī yaad aatī hai

ye hasīñ vādiyāñ us se mānūs thiiñ us kī jāgīr thiiñ

ek tūfān paiham havā meñ ḳharosh

sab hasīñ vādiyāñ yak-ba-yak so ga.iiñ

apni dahliz pe khaDa tanha

apna ghar ajnabi sa lagta tha

us ki ruKHsat thi manind-e-parwaz

har taraf abtari ka manzar tha

ek luknat-zada si virani

dar-o-diwar pe thi hairani

larazte aansu aur dukhta hua sar

rokte the use paimaish-e-virani se

wo ki soya hai ya ki jaga hai

subh se kyon ye samundar ka KHayal zehn mein aaj thapeDe mare

kohar-alud band darichon mein

jo wasia kaenat chhupti hai

na-umidi ki nilgun chadar ek samundar si phail jati hai

kyon ye rah rah ke samundar ka KHayal zehn mein aaj thapeDe mare

kitni manus thi qarib thi wo

jaise sahil ho ek samundar se

be-karan mauj jaise sahil ki god mein aa ke hi dam leti hai

us ki taswir us ke hilte lab

sare manzar hain zer-e-ab kahin

ek talatum ke baad sarkanDe

jaise patal mein chhup jate hain

kyon ye rah rah ke samundar ka KHayal zehn mein aaj thapeDe mare

sham ke dudhiya dhundlakon mein

tanha tanha udas phirta hai

raat jab siskiyon mein Dhalti hai

phir samundar ki yaad aati hai

ye hasin wadiyan us se manus thin us ki jagir thin

ek tufan paiham hawa mein KHarosh

sab hasin wadiyan yak-ba-yak so gain