samundar ke pichhe samundar

samundar ke pīchhe samundar

havāoñ ke pīchhe havā.eñ

masāfat ke pīchhe masāfat

falak se umaDtī huī bārishoñ ke pare bārisheñ haiñ

manāzir ke pīchhe manāzir

samundar zamāne kī sab dūriyoñ kā baserā

kināre pe vo pul kī ik raushnī sī

aur aage añdherā

kināroñ se aage

biphartī huī dūriyoñ ke pare dūriyāñ

aur paanī ke aage bhī paanī

samundar kī saarī kahānī

vahī ik tasalsul kā dhārā

vahī jhaag ābī-parinde havāoñ ke tūfāñ

vahī duur kā ik safar hai

kahīñ aane vaale zamānoñ ke nā-dīda manzar

kahīñ par khule pāniyoñ kī masāfat meñ qazzāq sadiyoñ kā Dar hai

vahī aage baḌhne kā ik shauq jo ham-safar hai

larazte hue bādbānoñ se aage bhī phaile hue bādbāñ haiñ

jahāzoñ ke pīchhe jahāzoñ kī lambī qatāreñ

udhar Doltī kashtiyoñ se pare duur sadiyoñ ke ubhre hue fāsloñ tak

bhaTaktī huī kashtiyāñ haiñ

samundar meñ yādoñ kī sadiyoñ kā maskan

kahīñ us ko dekhā kahīñ vo balā thā

yahī manzileñ thiiñ yahī rāsta thā

vahī nīlgūñ jagmagāhaT kī uḌtī chakā-chauñd ek pal ko jhalaktā huā us kā paikar

vahī us kī dhun meñ bhaTakne kī sadiyāñ

vo lahrāte mastūl vo uThte langar

samundar ke pīchhe samundar

samundar ke pichhe samundar

hawaon ke pichhe hawaen

masafat ke pichhe masafat

falak se umaDti hui barishon ke pare barishen hain

manazir ke pichhe manazir

samundar zamane ki sab duriyon ka basera

kinare pe wo pul ki ek raushni si

aur aage andhera

kinaron se aage

bipharti hui duriyon ke pare duriyan

aur pani ke aage bhi pani

samundar ki sari kahani

wahi ek tasalsul ka dhaara

wahi jhag aabi-parinde hawaon ke tufan

wahi dur ka ek safar hai

kahin aane wale zamanon ke na-dida manzar

kahin par khule paniyon ki masafat mein qazzaq sadiyon ka Dar hai

wahi aage baDhne ka ek shauq jo ham-safar hai

larazte hue baadbanon se aage bhi phaile hue baadban hain

jahazon ke pichhe jahazon ki lambi qataren

udhar Dolti kashtiyon se pare dur sadiyon ke ubhre hue faslon tak

bhaTakti hui kashtiyan hain

samundar mein yaadon ki sadiyon ka maskan

kahin us ko dekha kahin wo bala tha

yahi manzilen thin yahi rasta tha

wahi nilgun jagmagahaT ki uDti chaka-chaund ek pal ko jhalakta hua us ka paikar

wahi us ki dhun mein bhaTakne ki sadiyan

wo lahraate mastul wo uThte langar

samundar ke pichhe samundar