samundar par barish

yahāñ pe kal tak jo gaañv thā us ke sab makīñ ab

udaas qasboñ ġhalīz shahroñ meñ bas chuke haiñ

zamīñ ke siine se jhāḌiyoñ ḳhushk aur be-kār zard paudoñ

kī fasl ugtī hai har baras surḳh aag kā kārvāñ utartā hai

sub.h-dam dasht ke kināroñ pe phail jaatā hai

gard-e-āfāq meñ shab-sard kī hadoñ tak

yahāñ magar ek tā.ir-e-par-shikasta shāyad muqīm hai

dāstāñ ye kahtī hai bāl-o-par kī numūd hogī tulūa lamha-e-bād-o-bārāñ meñ

dasht par tabassum kā sail sail-e-rahmat paḌegā

ye sā.at-e-nek jab farāz-e-jūd se ḳhaak par utar kar qarīb aa.egī

tā.ir-e-par-shikasta parvāz kar ke kho jā.egā zamānoñ kī vus.atoñ meñ

magar abhī ḳhāk-zār meñ sail-e-vaqt ke darmiyān āñkheñ

fasurda-o-tishna-kām āñkheñ taras rahī haiñ

ki bārisheñ ab samundar par baras rahī haiñ

yahan pe kal tak jo ganw tha us ke sab makin ab

udas qasbon ghaliz shahron mein bas chuke hain

zamin ke sine se jhaDiyon KHushk aur be-kar zard paudon

ki fasl ugti hai har baras surKH aag ka karwan utarta hai

subh-dam dasht ke kinaron pe phail jata hai

gard-e-afaq mein shab-sard ki hadon tak

yahan magar ek tair-e-par-shikasta shayad muqim hai

dastan ye kahti hai baal-o-par ki numud hogi tulua lamha-e-baad-o-baran mein

dasht par tabassum ka sail sail-e-rahmat paDega

ye saat-e-nek jab faraaz-e-jud se KHak par utar kar qarib aaegi

tair-e-par-shikasta parwaz kar ke kho jaega zamanon ki wusaton mein

magar abhi KHak-zar mein sail-e-waqt ke darmiyan aankhen

fasurda-o-tishna-kaam aankhen taras rahi hain

ki barishen ab samundar par baras rahi hain