sanbhal kar chal

sañbhal kar chal

bahut gahrā añdherā hai

tumheñ ġhāroñ meñ aisā ġhaar kam hī mil sakegā

yahāñ dhartī nahīñ kuchh āsmāñ sā hai

daraḳht is niilī chhat ke saath yuuñ chipke haiñ

jaise ye isī ambar kā hissa hoñ

ka.ī din se ye sab niile daraḳht is āsmāñ se ug rahe haiñ

abhī maiñ tum se kyā kahne lagā thā

sañbhal kar

haañ mujhe kahnā thā

ki us ġhaar se nikleñ to shāyad āsmāñ se ham zamīñ dekheñ

magar ham to zamīñ par the

ye kaise āsmāñ par aa ga.e haiñ

ḳhalā to is zamīñ par bhī bahut hai

magar ham āsmāñ us ko nahīñ kahte

zamīñ to āsmāñ par bhī bahut hai

magar ham is ko dhartī kaise kah deñ

chalo us ġhaar se ho kar nikalte haiñ kisī jānib

sañbhal kar

haañ sañbhal kar chal

yahāñ par raushnī itnī ziyāda hai

ki āñkhoñ meñ añdherā bhar gayā hai

sanbhal kar chal

bahut gahra andhera hai

tumhein ghaaron mein aisa ghaar kam hi mil sakega

yahan dharti nahin kuchh aasman sa hai

daraKHt is nili chhat ke sath yun chipke hain

jaise ye isi ambar ka hissa hon

kai din se ye sab nile daraKHt is aasman se ug rahe hain

abhi main tum se kya kahne laga tha

sanbhal kar

han mujhe kahna tha

ki us ghaar se niklen to shayad aasman se hum zamin dekhen

magar hum to zamin par the

ye kaise aasman par aa gae hain

KHala to is zamin par bhi bahut hai

magar hum aasman us ko nahin kahte

zamin to aasman par bhi bahut hai

magar hum is ko dharti kaise kah den

chalo us ghaar se ho kar nikalte hain kisi jaanib

sanbhal kar

han sanbhal kar chal

yahan par raushni itni ziyaada hai

ki aankhon mein andhera bhar gaya hai