sandal ki KHushbu aur sanp

koī af.ī hai

jo chandan ke peḌ kī ḳhushbū se maḳhmūr ho uThtā hai

us kī shāḳhoñ us ke pattoñ se lipaT kar

na jaane kyā DhūñDtā rahtā hai

jaise chāñd kī taak meñ har dam chakor rahtā hai

jaise chāñd kī ghaat meñ koī megh kā kaalā chor rahtā hai

aur phir ek pal aisā bhī aatā hai

jab vo chāñd ko apnī bāñhoñ meñ bhar letā hai

duniyā kī nigāhoñ se bachā kar apnī āġhosh meñ Dhāñp letā hai

safedī zulmat meñ hal ho jaatī hai

raushnī tārīkī meñ badal jaatī hai

lekin

ye tārīkī hī aslan taḳhlīq kā mamba.a hai

man kā af.ī bhī

rahnā chāhtā hai

tere gird-o-pesh

go tirī zulf koī shañkar kī jaTā bhī nahīñ

phir kyuuñ ye af.ī

terī gardan tere nāf-e-tan meñ hamā.il honā chāhtā hai

bār-bār

tere sandal badan kī ḳhushbū

koī amrit koī somras bhī nahīñ,

phir kyuuñ ye dushT raahū ketū kī tarah

piinā chāhtā hai use buuñd buuñd chāl-bāzī se

tārīkī hī terā muqaddar Thahrā

terā maskan bhī tārīk hai

ai zulqarnain

zulmat hī to āb-e-hayāt kā sar-chashma hai

terā sukūn terā qarār bhī tārīk hai

tārīkī hī asl mañb-e-nūr hai

taḳhlīq-e-kā.enāt kā shu.ūr hai

bādal jab chhaTtā hai

chāñd aur bhī damaktā hai

megh-dūt ke kaale ghane halqe se nikal kar

chāñd aur bhī dūdhiyā pur-nūr ho jaatā hai

sandal ke shajar se lipaT ke saañp

aur bhī masrūr ho jaatā hai

lā-shu.ūr se shu.ūr kā safar ḳhatm ho jaatā hai

koi afi hai

jo chandan ke peD ki KHushbu se maKHmur ho uThta hai

us ki shaKHon us ke patton se lipaT kar

na jaane kya DhunDta rahta hai

jaise chand ki tak mein har dam chakor rahta hai

jaise chand ki ghat mein koi megh ka kala chor rahta hai

aur phir ek pal aisa bhi aata hai

jab wo chand ko apni banhon mein bhar leta hai

duniya ki nigahon se bacha kar apni aaghosh mein Dhanp leta hai

safedi zulmat mein hal ho jati hai

raushni tariki mein badal jati hai

lekin

ye tariki hi aslan taKHliq ka mamba hai

man ka afi bhi

rahna chahta hai

tere gird-o-pesh

go teri zulf koi shankar ki jaTa bhi nahin

phir kyun ye afi

teri gardan tere naf-e-tan mein hamail hona chahta hai

bar-bar

tere sandal badan ki KHushbu

koi amrit koi somras bhi nahin,

phir kyun ye dushT rahu ketu ki tarah

pina chahta hai use bund bund chaal-bazi se

tariki hi tera muqaddar Thahra

tera maskan bhi tarik hai

ai zulqarnain

zulmat hi to aab-e-hayat ka sar-chashma hai

tera sukun tera qarar bhi tarik hai

tariki hi asl manb-e-nur hai

taKHliq-e-kaenat ka shuur hai

baadal jab chhaTta hai

chand aur bhi damakta hai

megh-dut ke kale ghane halqe se nikal kar

chand aur bhi dudhiya pur-nur ho jata hai

sandal ke shajar se lipaT ke sanp

aur bhi masrur ho jata hai

la-shuur se shuur ka safar KHatm ho jata hai