sandesa

use kahnā

kabhī milne chalā aa.e

hamāre paañv meñ jo rāsta thā

rāste meñ peḌ the

peḌoñ pe jitnī tā.eroñ kī Toliyāñ

ham se milā kartī thiiñ

ab vo uḌte uḌte thak ga.ī haiñ

vo ghanī shāḳheñ jo ham par saayā kartī thiiñ

vo sab murjhā ga.ī haiñ

tum use kahnā

kabhī milne chalā aa.e

laboñ par lafz haiñ

lafzoñ meñ koī dāstāñ qissa kahānī

jo use aksar sunāte the

kise jā kar sunā.eñge

batā.eñge

ki ham mehrāb-e-abrū meñ sitāre Tāñkne vaale

dar-e-lab bosa-e-iz.hār kī dastak se aksar kholne vaale

kabhī bikhrī huī zulfoñ meñ ham

mahtāb ke gajre banā kar bāñdhne vaale

charāġh aur aa.ine ke darmiyāñ

kab se sar-e-sāhil khaḌe maujoñ ko takte haiñ

use kahnā

use ham yaad karte haiñ

use kahnā

ham aa kar ḳhud use milte

magar maqtal badalte mausamoñ ke ḳhuun meñ rañgīn hai

aur ham

qatār andar qatār aise bahut se mausamoñ ke darmiyāñ

tanhā khaḌe haiñ

jaane kab apnā bulāvā ho

ki ham meñ aaj bhī

ik umr kī vāraftagī aur vahshatoñ kā raqs jaarī hai

vo baazī jo bisāt-e-jāñ pe khelī thī

abhī ham ne na jiitī hai na haarī hai

use kahnā kabhī milne chalā aa.e

ki ab kī baar shāyad

apnī baarī hai

use kahna

kabhi milne chala aae

hamare panw mein jo rasta tha

raste mein peD the

peDon pe jitni taeron ki Toliyan

hum se mila karti thin

ab wo uDte uDte thak gai hain

wo ghani shaKHen jo hum par saya karti thin

wo sab murjha gai hain

tum use kahna

kabhi milne chala aae

labon par lafz hain

lafzon mein koi dastan qissa kahani

jo use aksar sunate the

kise ja kar sunaenge

bataenge

ki hum mehrab-e-abru mein sitare Tankne wale

dar-e-lab bosa-e-izhaar ki dastak se aksar kholne wale

kabhi bikhri hui zulfon mein hum

mahtab ke gajre bana kar bandhne wale

charagh aur aaine ke darmiyan

kab se sar-e-sahil khaDe maujon ko takte hain

use kahna

use hum yaad karte hain

use kahna

hum aa kar KHud use milte

magar maqtal badalte mausamon ke KHun mein rangin hai

aur hum

qatar andar qatar aise bahut se mausamon ke darmiyan

tanha khaDe hain

jaane kab apna bulawa ho

ki hum mein aaj bhi

ek umr ki waraftagi aur wahshaton ka raqs jari hai

wo bazi jo bisat-e-jaan pe kheli thi

abhi hum ne na jiti hai na haari hai

use kahna kabhi milne chala aae

ki ab ki bar shayad

apni bari hai