sannaTa

merī gardan mere shāne mere lab

sab ke sab vīrān haiñ

apne ghar meñ ek maiñ huuñ

aur kaalī raat kā pur-haul sannāTā

kisī ke paañv kī aahaT nahīñ

chūḌiyoñ aur bartanoñ kī khan-khanāhaT bhī nahīñ

suuī dhāge ek duuje se bhare baiThe hue haiñ

dhuul meñ lipTī kitābeñ

mez par bikhrī paḌī haiñ

aur chūlhā

lakḌiyoñ kī yaad meñ gum-sum

ek kone meñ paḌā hai

aur ik an-jānā saayā

ghar kī chaukhaT par khaḌā hai

ik hasīñ-tasvīr jo dīvār par laTkī huī hai

dekh kar mujh ko malūl

chupke chupke ro rahī hai

aur kaalī raat kā pur-haul sannāTā

khilkhilā kar hañs rahā hai

meri gardan mere shane mere lab

sab ke sab viran hain

apne ghar mein ek main hun

aur kali raat ka pur-haul sannaTa

kisi ke panw ki aahaT nahin

chuDiyon aur bartanon ki khan-khanahaT bhi nahin

sui dhage ek duje se bhare baiThe hue hain

dhul mein lipTi kitaben

mez par bikhri paDi hain

aur chulha

lakDiyon ki yaad mein gum-sum

ek kone mein paDa hai

aur ek an-jaana saya

ghar ki chaukhaT par khaDa hai

ek hasin-taswir jo diwar par laTki hui hai

dekh kar mujh ko malul

chupke chupke ro rahi hai

aur kali raat ka pur-haul sannaTa

khilkhila kar hans raha hai