saped phul

saped phuul raat ke siyāh pāniyoñ se

aarzū kī ābshār se

luḌhaktā tairtā bhaTaktā pattharoñ kī rahguzar se jā.egā

to rauzan-e-farāz-e-kohsār se

nazar uThā ke us ko dekhnā

vo kaun thā

fuġhāñ ke marhaloñ meñ us ko kyā huā

vo barg barg hogā zaḳhm zaḳhm sail-e-ḳhūñ sadā-e-ḳhūn

vo shāḳh se burīda ho gayā to ek ḳhvāb thā

vo ḳhvāb se burīda ho gayā to sirf rah-rav-e-nidā-e-māvarā-e-qurb-o-lams

sirf barg-āsā āḳhirī sadā-e-dil

vo sabz thā na surḳh thā na zard thā

saped thā

siyāh gar na ho sakā to mahz ittifāq thā ye hādisa

ye saarī bāteñ

tum se kah rahā huuñ

tum jo sirf aañkh ho

farāz-e-koh par tumhārā rū-e-āftāb hai

maiñ phuul huuñ saped phuul

kaun hai mirā vahāñ

maiñ ābshār kī jilā-vatan udaas saltanat se

vādiyoñ kī samt shaam se ravāñ

muqaddaroñ kī ai sitam-zarīf sā’at-e-garāñ

ḳhudā kare ki aaj tum bhī chashm-e-nāz se

farāz-e-koh-sār se

saped phuul kā ye āḳhirī safar

mushāhide ke aa.ine meñ dekh lo

maiñ phuul maiñ saped phuul vādiyoñ meñ

āb-jū kī narm-rau udāsiyoñ meñ reza-reza

tum ko yaad kar ke

zer-e-āb khil uThūñgā bahr-e-be-karāñ ke darmiyān jashn-e-vasl meñ

magar farāz-e-koh kā nasheb-e-kohsār se

mire ḳhudā mirā mirī hī manziloñ se fāsla

kahāñ rukegā be-amāñ muqaddaroñ kā qāfila

saped phul raat ke siyah paniyon se

aarzu ki aabshaar se

luDhakta tairta bhaTakta pattharon ki rahguzar se jaega

to rauzan-e-faraaz-e-kohsar se

nazar uTha ke us ko dekhna

wo kaun tha

fughan ke marhalon mein us ko kya hua

wo barg barg hoga zaKHm zaKHm sail-e-KHun sada-e-KHun

wo shaKH se burida ho gaya to ek KHwab tha

wo KHwab se burida ho gaya to sirf rah-raw-e-nida-e-mawara-e-qurb-o-lams

sirf barg-asa aaKHiri sada-e-dil

wo sabz tha na surKH tha na zard tha

saped tha

siyah gar na ho saka to mahz ittifaq tha ye hadisa

ye sari baaten

tum se kah raha hun

tum jo sirf aankh ho

faraaz-e-koh par tumhaara ru-e-aftab hai

main phul hun saped phul

kaun hai mera wahan

main aabshaar ki jila-watan udas saltanat se

wadiyon ki samt sham se rawan

muqaddaron ki ai sitam-zarif sa’at-e-garan

KHuda kare ki aaj tum bhi chashm-e-naz se

faraaz-e-koh-sar se

saped phul ka ye aaKHiri safar

mushahide ke aaine mein dekh lo

main phul main saped phul wadiyon mein

aab-ju ki narm-rau udasiyon mein reza-reza

tum ko yaad kar ke

zer-e-ab khil uThunga bahr-e-be-karan ke darmiyan jashn-e-wasl mein

magar faraaz-e-koh ka nasheb-e-kohsar se

mere KHuda mera meri hi manzilon se fasla

kahan rukega be-aman muqaddaron ka qafila