sapnon ka jahan

mehnat kā kaḌā din Dhalte hī

jab raat suhānī aatī hai

jab chāñd sitāroñ se fitrat

ākāsh kī maañg sajātī hai

jab barbat-o-nai baj uThte haiñ

paa.el kī sadā lahrātī hai

tab niiñd se bojhal āñkhoñ meñ

sapnoñ kī vo pariyāñ aatī haiñ

sun sun ke madhur lorī jin kī

dukhtā huā dil so jaatā hai

dukhtā huā man so jaatā hai

aur raat Dhale sapnoñ kā jahāñ

yuuñ lagtā hai jaise rāhat-e-jāñ

sapnoñ ke jahāñ meñ ai hamdam

mahbūb kī qurbat hotī hai

dīdār kī saa.at hotī hai

is sā.at-e-rangīñ meñ pinhāñ

dāman kī havā zulfoñ kī mahak

hoñToñ kī lapak bāñhoñ kī lachak

mehrābeñ umañDte sīnoñ kī

sarshār-e-mohabbat kartī haiñ

aur raat pighaltī rahtī hai

sapnoñ ke jahāñ meñ ham donoñ

ik peḌ ke nīche baiThe hue

mahtāb ko takte rahte haiñ

phir sub.h kā taarā ugtā hai

duniyā meñ sahar ho jaatī hai

mehnat ka kaDa din Dhalte hi

jab raat suhani aati hai

jab chand sitaron se fitrat

aakash ki mang sajati hai

jab barbat-o-nai baj uThte hain

pael ki sada lahraati hai

tab nind se bojhal aankhon mein

sapnon ki wo pariyan aati hain

sun sun ke madhur lori jin ki

dukhta hua dil so jata hai

dukhta hua man so jata hai

aur raat Dhale sapnon ka jahan

yun lagta hai jaise rahat-e-jaan

sapnon ke jahan mein ai hamdam

mahbub ki qurbat hoti hai

didar ki saat hoti hai

is saat-e-rangin mein pinhan

daman ki hawa zulfon ki mahak

honTon ki lapak banhon ki lachak

mehraben umanDte sinon ki

sarshaar-e-mohabbat karti hain

aur raat pighalti rahti hai

sapnon ke jahan mein hum donon

ek peD ke niche baiThe hue

mahtab ko takte rahte hain

phir subh ka tara ugta hai

duniya mein sahar ho jati hai