sar-zamin-e-yas

jiine se dil bezār hai

har saañs ik āzār hai

kitnī hazīñ hai zindagī

andoh-gīñ hai zindagī

vo bazm-e-ahbāb-e-vatan

vo ham-navāyān-e-suḳhan

aate haiñ jis dam yaad ab

karte haiñ dil nāshād ab

guzrī huī rañgīniyāñ

khoī huī dilchaspiyāñ

pahroñ rulātī haiñ mujhe

akasr satātī haiñ mujhe

vo zamzame vo chahchahe

vo rūh-afzā qahqahe

jab dil ko maut aa.ī na thī

yuuñ be-hisī chhā.ī na thī

college kī rañgīñ vādiyāñ

vo dil nashīñ ābādiyāñ

vo nāznīnān-e-vatan

zohra-jabīnān-e-vatan

jin meñ se ik rañgīñ qabā

ātish-nafs ātish-navā

kar ke mohabbat āshnā

rañg-e-aqīdat āshnā

mere dil-e-nākām ko

ḳhūñ-gashta-e-ālām ko

dāġh-e-judā.ī de ga.ī

saarī ḳhudā.ī le ga.ī

un sā.atoñ kī yaad meñ

un rāhatoñ kī yaad meñ

maġhmūm sā rahtā huuñ maiñ

ġham kī kasak sahtā huuñ maiñ

suntā huuñ jab ahbāb se

qisse ġham-e-ayyām ke

betāb ho jaatā huuñ maiñ

aahoñ meñ kho jaatā huuñ maiñ

phir vo azīz-o-aqribā

jo toḌ kar ahd-e-vafā

ahbāb se muñh moḌ kar

duniyā se rishta toḌ kar

hadd-e-ufuq se us taraf

rañg-e-shafaq se us taraf

ik vādī-e-ḳhāmosh kī

ik ālam-e-behosh kī

gahrā.iyoñ meñ sau ga.e

tārīkiyoñ meñ kho ga.e

un kā tasavvur nā-gahāñ

letā hai dil meñ chuTkiyāñ

aur ḳhuuñ rulātā hai mujhe

be-kal banātā hai mujhe

vo gaañv kī ham-joliyāñ

maflūk dahqāñ-zādiyāñ

jo dast-e-fart-e-yās se

aur yūrish-e-aflās se

ismat luTā kar rah ga.iiñ

ḳhud ko gañvā kar rah ga.iiñ

ġhamgīñ javānī ban ga.iiñ

rusvā kahānī ban ga.iiñ

un se kabhī galiyoñ meñ ab

hotā huuñ maiñ do-chār jab

nazreñ jhukā letā huuñ maiñ

ḳhud ko chhupā letā huuñ maiñ

kitnī hazīñ hai zindagī

andoh-gīñ hai zindagī

jine se dil bezar hai

har sans ek aazar hai

kitni hazin hai zindagi

andoh-gin hai zindagi

wo bazm-e-ahbab-e-watan

wo ham-nawayan-e-suKHan

aate hain jis dam yaad ab

karte hain dil nashad ab

guzri hui ranginiyan

khoi hui dilchaspiyan

pahron rulati hain mujhe

akasr satati hain mujhe

wo zamzame wo chahchahe

wo ruh-afza qahqahe

jab dil ko maut aai na thi

yun be-hisi chhai na thi

college ki rangin wadiyan

wo dil nashin aabaadiyan

wo nazninan-e-watan

zohra-jabinan-e-watan

jin mein se ek rangin qaba

aatish-nafs aatish-nawa

kar ke mohabbat aashna

rang-e-aqidat aashna

mere dil-e-nakaam ko

KHun-gashta-e-alam ko

dagh-e-judai de gai

sari KHudai le gai

un saaton ki yaad mein

un rahaton ki yaad mein

maghmum sa rahta hun main

gham ki kasak sahta hun main

sunta hun jab ahbab se

qisse gham-e-ayyam ke

betab ho jata hun main

aahon mein kho jata hun main

phir wo aziz-o-aqriba

jo toD kar ahd-e-wafa

ahbab se munh moD kar

duniya se rishta toD kar

hadd-e-ufuq se us taraf

rang-e-shafaq se us taraf

ek wadi-e-KHamosh ki

ek aalam-e-behosh ki

gahraiyon mein sau gae

tarikiyon mein kho gae

un ka tasawwur na-gahan

leta hai dil mein chuTkiyan

aur KHun rulata hai mujhe

be-kal banata hai mujhe

wo ganw ki ham-joliyan

mafluk dahqan-zadiyan

jo dast-e-fart-e-yas se

aur yurish-e-aflas se

ismat luTa kar rah gain

KHud ko ganwa kar rah gain

ghamgin jawani ban gain

ruswa kahani ban gain

un se kabhi galiyon mein ab

hota hun main do-chaar jab

nazren jhuka leta hun main

KHud ko chhupa leta hun main

kitni hazin hai zindagi

andoh-gin hai zindagi