sarab-e-tahzib

kishvar-e-maġhrib alam-bardār-e-tahzīb-e-jadīd

aa dikhā duuñ maiñ tujhe anvār-e-tahzīb-e-jadīd

tū samajhtā hai jise apnī taraqqī kā kamāl

ḳhatm hotī hai yahīñ par āḳhirī hadd-e-zavāl

tū ne ai ġhāfil samajh rakhā hai jis ko bām-e-auj

hai ye tūfān-e-halākat-āfrīñ kī ek mauj

tū taraqqī kah rahā hai jis ko duniyā ke ġhulām

hai ye terī pastī-e-aḳhlāq kā ik aur naam

maiñ ne maanā hai anāsir par hukūmat terī aaj

terī haibat le rahī hai bādshāhoñ se ḳhirāj

raushnī science kī go tere aivānoñ meñ hai

nūr-e-īmānī bhī lekin dil ke kāshānoñ meñ hai

aql kī sham.oñ se go raushan haiñ fānūs-e-dimāġh

dil kī zulmat meñ jalāyā bhī kabhī tū ne charāġh

shaukat-e-kisrā o shān-e-jam to darbāroñ meñ hai

jins-e-nāyāb-e-vafā bhī tere bāzāroñ meñ hai

aks-e-īsār-o-sadāqat bhī ruḳh-e-raushan meñ hai

mehr-o-ulfat kā bhī koī phuul is gulshan meñ hai

sāz-o-sāmān-e-tarab sab kuchh tirī mahfil meñ hai

dard-e-insānī kā bhī jalva kisī ke dil meñ hai

māddiyat ke nashe se mast hai terā ġhurūr

kyā magar dil ko tire hāsil hai rūhānī surūr

ye nahīñ to faḳhr is tahzīb par be-kār hai

nang-e-insāñ ye tamaddun maujib-e-sad-ār hai

kishwar-e-maghrib alam-bardar-e-tahzib-e-jadid

aa dikha dun main tujhe anwar-e-tahzib-e-jadid

tu samajhta hai jise apni taraqqi ka kamal

KHatm hoti hai yahin par aaKHiri hadd-e-zawal

tu ne ai ghafil samajh rakha hai jis ko baam-e-auj

hai ye tufan-e-halakat-afrin ki ek mauj

tu taraqqi kah raha hai jis ko duniya ke ghulam

hai ye teri pasti-e-aKHlaq ka ek aur nam

main ne mana hai anasir par hukumat teri aaj

teri haibat le rahi hai baadshahon se KHiraj

raushni science ki go tere aiwanon mein hai

nur-e-imani bhi lekin dil ke kashanon mein hai

aql ki shamon se go raushan hain fanus-e-dimagh

dil ki zulmat mein jalaya bhi kabhi tu ne charagh

shaukat-e-kisra o shan-e-jam to darbaron mein hai

jins-e-nayab-e-wafa bhi tere bazaron mein hai

aks-e-isar-o-sadaqat bhi ruKH-e-raushan mein hai

mehr-o-ulfat ka bhi koi phul is gulshan mein hai

saz-o-saman-e-tarab sab kuchh teri mahfil mein hai

dard-e-insani ka bhi jalwa kisi ke dil mein hai

maddiyat ke nashe se mast hai tera ghurur

kya magar dil ko tere hasil hai ruhani surur

ye nahin to faKHr is tahzib par be-kar hai

nang-e-insan ye tamaddun maujib-e-sad-ar hai