sard, tarik raat

is qadar tiira o sard hargiz na thā dil kā mausam kabhī

ek pal meñ ḳhudā jaane kyā ho gayā

chāñd kī vādiyoñ meñ utar aa.ī shab!

maiñ vo tanhā subuk-pā musāfir thā takmīl kī justujū

khīñch laa.ī thī ik roz jis ko yahāñ

aarzū thī mujhe maiñ zamīñ ke liye

merī tarrār purkār chashm-e-nihāñ

fāsloñ sarhadoñ

vaqt ke sab hisāroñ ke us paar kī

shahr-e-imroz meñ

an-ginat ḳhūbsūrat tasāvīr āvezāñ kar degī jab

duur kī har pur-asrār sarshār āvāz mere lahū meñ utar jā.egī

mere dāman ko phūloñ se bhar jā.egī

sard se sard-tar

har ghaḌī ho rahī hai rag-o-pai meñ bahte anāsir kī rau

shab guzar jā.egī

chāñd kī munjamid vādiyoñ meñ sulagtī huī raushnī

sub.h-dam ek pal meñ umañD aa.egī

mujh ko Dar hai magar

sā.at-e-nau ke hañgām se peshtar

tiira sard shab kā bhayānak amal

dil ke āfāq par

ho na jaa.e kahīñ maut tak hukmarāñ

ḳhatm ho jaa.e takmīl kī dāstāñ!!

is qadar tera o sard hargiz na tha dil ka mausam kabhi

ek pal mein KHuda jaane kya ho gaya

chand ki wadiyon mein utar aai shab!

main wo tanha subuk-pa musafir tha takmil ki justuju

khinch lai thi ek roz jis ko yahan

aarzu thi mujhe main zamin ke liye

meri tarrar purkar chashm-e-nihan

faslon sarhadon

waqt ke sab hisaron ke us par ki

shahr-e-imroz mein

an-ginat KHubsurat tasawir aawezan kar degi jab

dur ki har pur-asrar sarshaar aawaz mere lahu mein utar jaegi

mere daman ko phulon se bhar jaegi

sard se sard-tar

har ghaDi ho rahi hai rag-o-pai mein bahte anasir ki rau

shab guzar jaegi

chand ki munjamid wadiyon mein sulagti hui raushni

subh-dam ek pal mein umanD aaegi

mujh ko Dar hai magar

saat-e-nau ke hangam se peshtar

tera sard shab ka bhayanak amal

dil ke aafaq par

ho na jae kahin maut tak hukmaran

KHatm ho jae takmil ki dastan!!