sardi

sardī bārish ke ba.ad aatī hai

ik shagūfa nayā khilātī hai

din sikuḌtā hai raat baḌhtī hai

kohre kī hukmarānī hotī hai

is meñ shabnam Tapaktī hai gul par

is se hotā hai ḳhushk gulshan-e-tar

is meñ aatā hai barg-e-gul pe shabāb

is meñ khilte haiñ har tarah ke gulāb

ye dikhātī hai jab asar apnā

saarā māhaul hotā hai ThanDā

jab havā ḳhuub ThanDī chaltī hai

jaan aafat meñ sab kī aatī hai

bachche būḌhe javān mard o zan

saare mahsūs karte haiñ uljhan

jism jab un kā tharātā hai

daañt apne har ik bajātā hai

yā to kambal meñ raat kāTte haiñ

yā razā.ī meñ muñh chhupāte haiñ

shab ko chūlhā gharoñ meñ jaltā hai

din meñ sūraj se chain miltā hai

shaal muflar se miltī hai rāhat

coat sweater se baḌhtī hai chāhat

jab havā sard sard chaltī hai

soch 'sāhil' kī nazm bantī hai

sardi barish ke baad aati hai

ek shagufa naya khilati hai

din sikuDta hai raat baDhti hai

kohre ki hukmarani hoti hai

is mein shabnam Tapakti hai gul par

is se hota hai KHushk gulshan-e-tar

is mein aata hai barg-e-gul pe shabab

is mein khilte hain har tarah ke gulab

ye dikhati hai jab asar apna

sara mahaul hota hai ThanDa

jab hawa KHub ThanDi chalti hai

jaan aafat mein sab ki aati hai

bachche buDhe jawan mard o zan

sare mahsus karte hain uljhan

jism jab un ka tharaata hai

dant apne har ek bajata hai

ya to kambal mein raat kaTte hain

ya razai mein munh chhupate hain

shab ko chulha gharon mein jalta hai

din mein suraj se chain milta hai

shaal muflar se milti hai rahat

coat sweater se baDhti hai chahat

jab hawa sard sard chalti hai

soch 'sahil' ki nazm banti hai