sarhaden

koī to ho is jahāñ meñ aisā

ki jis ke bas meñ ho saarī duniyā

kī sarhadoñ kī sabhī lakīreñ

jahāñ ke naqshe se ek pal meñ

kisī jatan se miTā ke rakh de

ye āhanī ḳhār-dār tāreñ

zamīn ke saath dil ke rishte bhī bāñTtī haiñ

ka.ī diloñ meñ tavīl arse se chubh rahī haiñ

koī to un ko ukhāḌ pheñke

koī to ho jo tamām duniyā

ko ek ḳhitte kī shakl de de

agar koī mo.ajiza dikhā de

to saare insān jab bhī chāheñ

phir apne pyāroñ se mil sakeñge

baġhair visa kī bandishoñ ke

sahūlatoñ se masarratoñ se

phir is ke badle agar vo mujh se

mirī matā-e-hayāt māñge

to ek pal ko bhī maiñ na sochūñ

ḳhushī ḳhushī us ko daan kar duuñ

koi to ho is jahan mein aisa

ki jis ke bas mein ho sari duniya

ki sarhadon ki sabhi lakiren

jahan ke naqshe se ek pal mein

kisi jatan se miTa ke rakh de

ye aahani KHar-dar taren

zamin ke sath dil ke rishte bhi banTti hain

kai dilon mein tawil arse se chubh rahi hain

koi to un ko ukhaD phenke

koi to ho jo tamam duniya

ko ek KHitte ki shakl de de

agar koi moajiza dikha de

to sare insan jab bhi chahen

phir apne pyaron se mil sakenge

baghair wisa ki bandishon ke

sahulaton se masarraton se

phir is ke badle agar wo mujh se

meri mata-e-hayat mange

to ek pal ko bhi main na sochun

KHushi KHushi us ko dan kar dun