sarisht

mirī taḳhlīq se pahle

ḳhudā-e-‘azz-o-jal ne jab mirī buniyād rakkhī thī

kahā jaao zamīñ ko dekh aao

samundar se milo

kuchh rābta kar lo

añdheroñ meñ ghirī nauḳhez dhartī

aur shorīda samundar

kū-ba-kū bāñheñ pasāre

muntazir the

'adam ke paar se aatī

sadā-e-be-sadā.ī

havā.ī sar-ba-sar muñh-zor

sad.hā muztarib sāñpoñ kī phunkāreñ

sarāpā sarkash-o-maġhrūr vahshī paañv se rauñde hue

sāhil

garajtā lahlahātā thā samundar

aur lahreñ sar paTaktī thiiñ

azal ke us ḳharābe se

churā lī maiñ ne ḳhāmoshī se

sarkash mauj

ik phunkār

dāman meñ chhupā.e lauT aayā

ḳhudā-e-‘azz-o-jal ne phir mujhe bhejā zamīñ par

aur makāñ se lā-makāñ tak ik safar darpesh thā

mujh ko

magar ab tak vo sarkash mauj

mujh meñ maujzan hai

be-muhābā aaj bhī mujh meñ uchhaltī

gūñjtī hai

aur mujhe bechain rakhtī hai

meri taKHliq se pahle

KHuda-e-‘azz-o-jal ne jab meri buniyaad rakkhi thi

kaha jao zamin ko dekh aao

samundar se milo

kuchh rabta kar lo

andheron mein ghiri nauKHez dharti

aur shorida samundar

ku-ba-ku banhen pasare

muntazir the

'adam ke par se aati

sada-e-be-sadai

hawai sar-ba-sar munh-zor

sadha muztarib sanpon ki phunkaren

sarapa sarkash-o-maghrur wahshi panw se raunde hue

sahil

garajta lahlahata tha samundar

aur lahren sar paTakti thin

azal ke us KHarabe se

chura li main ne KHamoshi se

sarkash mauj

ek phunkar

daman mein chhupae lauT aaya

KHuda-e-‘azz-o-jal ne phir mujhe bheja zamin par

aur makan se la-makan tak ek safar darpesh tha

mujh ko

magar ab tak wo sarkash mauj

mujh mein maujzan hai

be-muhaba aaj bhi mujh mein uchhalti

gunjti hai

aur mujhe bechain rakhti hai