سرشاری

نشۂ فکر سے سرشار تھی شام

پھر بہائے شب دیجور نہ پوچھ

دل رنجور نہ پوچھ

چشم بے خواب میں خوابوں کی بہار

یعنی نادیدہ بہاروں کے چمن

کتنے نا رستہ گلابوں کی پھبن

دشت امکان میں نا گفتہ سخن

کتنے کابوس کے شب خوں

شب دیجور نہ پوچھ

دل رنجور نہ پوچھ

درد تھا درد کی لذت دل بے تاب بھی تھا

نم تھے دامان و گریباں سر بالیں نم تھا

کیا سبب تھا کہ زباں حرف و بیاں تھے مفلوج

بیوگئ سر قرطاس کا عالم مت پوچھ

بے بسی صوت و صدا کی شب دیجور نہ پوچھ

دل رنجور نہ پوچھ

وقت ایسا بھی پڑا فصل جنوں بھی آئی

فاصلے مٹ گئے دامن سے گریباں لپٹا

خوشۂ فکر کی سرخی سر مژگاں چھلکی

رقص میں سارا جہاں تھا

شب دیجور نہ پوچھ

دل رنجور نہ پوچھ