saughat

jashn-e-nauroz bhī hai

jashn-e-bahārāñ bhī hai

shab-e-mahtāb bhī

jashn-e-mah-e-tābāñ bhī hai

sunte haiñ aaj hī

jashn-e-shah-e-ḳhūbāñ bhī hai

aa ai dil-e-betāb

chaleñ ham bhī vahāñ

jashn kī raat hai

sauġhāt to baTtī hogī

apne hisse kī chaleñ

ham bhī uThā leñ sauġhāt

dard kī āḳhirī siine se

lagā leñ sauġhāt

aur phir yuuñ ho ki

jab shaam Dhale

us meñ bhiig ke

gul-mohar kī ḳhushbū phaile

yaad kī chāñdnī

be-ḳhvāb darīchoñ pe gire

phir usī jashn kī ye raat

mire kaam aa.e

dard kī āḳhirī sauġhāt

mire kaam aa.e

āḳhirī shab shab-e-āḳhir Thahre

zid pe aayā huā ye dil Thahre

toḌ duuñ shīsha jo hastī kā bhī

phir jaam aa.e

kaam aa.e to vo sauġhāt

mire kaam aa.e

jashn kī raat hai yuuñ nazr guzārī jaa.e

ek ik aarzū sadqe meñ utārī jaa.e

jashn-e-nauroz bhi hai

jashn-e-bahaaran bhi hai

shab-e-mahtab bhi

jashn-e-mah-e-taban bhi hai

sunte hain aaj hi

jashn-e-shah-e-KHuban bhi hai

aa ai dil-e-betab

chalen hum bhi wahan

jashn ki raat hai

saughat to baTti hogi

apne hisse ki chalen

hum bhi uTha len saughat

dard ki aaKHiri sine se

laga len saughat

aur phir yun ho ki

jab sham Dhale

us mein bhig ke

gul-mohar ki KHushbu phaile

yaad ki chandni

be-KHwab darichon pe gire

phir usi jashn ki ye raat

mere kaam aae

dard ki aaKHiri saughat

mere kaam aae

aaKHiri shab shab-e-aKHir Thahre

zid pe aaya hua ye dil Thahre

toD dun shisha jo hasti ka bhi

phir jam aae

kaam aae to wo saughat

mere kaam aae

jashn ki raat hai yun nazr guzari jae

ek ek aarzu sadqe mein utari jae