saugandhi

ik mausam mire dil ke andar

ik mausam mire bāhar

ik rasta mire pīchhe bhāge

ik rasta mire aage

biich meñ chup chup khaḌī huuñ jaise

būjhī huī bujhārt

kis ko dosh duuñ, jaane mujh ko

kis ne kiyā akārat

ā.īna dekhūñ, baal sañvārūñ

lab pe hañsī sajā.ūñ

galā-saḌā vahī gosht ki jis par

baiThī rañg chaḌhā.ūñ

jaane kitnī barf pighal ga.ī

bah gayā kitnā paanī

kis nadiyā meñ DhūñDūñ bachpan

kis dariyā meñ javānī

raat aa.e mirī haDDiyāñ jāgeñ

din jaage maiñ so.uuñ

apne ujaaḌ badan se lag kar

kabhī hañsūñ, kabhī ro.uuñ

ek bhayānak sapnā: aag meñ lipTī jaltī jā.ūñ

cholī meñ aḌse sikkoñ ke sañg pighaltī jā.ūñ

ik mausam mire dil ke andar

ik mausam mire bāhar

ik rasta mire pīchhe bhāge

ik rasta mire aage

raste biich maiñ khaḌī akelī

piyā na sañg sahelī

kyā jaane mujh janm-jalī ne

kyā aprādh kiyā hai

āḳhir kyuuñ duniyā kā maiñ ne saarā zahr piyā hai

saarī umr na jaane apne badan meñ kise jiyā hai

mere saath zamāne!

tū ne achchhā nahīñ kiyā hai

duur khaḌe mire āñgan dvāre

pal pal paas bulā.eñ

kaho havāoñ se ab, un ko

duur bahut hī duur kahīñ le jaa.eñ

jhuuT kī ye kaalī dīvāreñ

jhuuT kā farsh aur chhat hai

jhuuT kā bistar jhuuT ke sāthī

jhuuT kī har sañgat hai

jhuuT bichhā.ūñ, jhuuT lapeTūñ

jhuuT utārūñ, pahnūñ

jhuuT pahan kar jism ke vīrāne meñ dauḌtī jā.ūñ

sach ke jugnū bol kahāñ hai

kab se tujhe bulā.ūñ

is lambī tārīk saḌak par kab tak chaltī jā.ūñ

kyuuñ nahīñ zehn kī dīvāroñ se

Takrā.ūñ, mar jā.ūñ

sham.a sarekhī pighal rahī huuñ

ojhal kabhī ujāgar

ik mausam mire dil ke andar

ik mausam mire bāhar

mujh se milne kaun aa.e ab in tanhā rāhoñ par

boTī boTī baT ga.ī merī raushan chaurāhoñ par

is gahre sannāTe meñ kis ko āvāz lagā.ūñ

kaun aa.egā madad ko merī

kyā chīḳhoñ chillā.ūñ

apne murda gosht kī chādar

oḌh ke chup ho jā.ūñ

aur achānak nīndoñ kī daldal meñ gum ho jā.ūñ

kisī ke haath na aa.uuñ

ḳhud ko maiñ ḳhud DhūñDne niklūñ

lekin kahīñ na pā.ūñ

ek mausam mere dil ke andar

ek mausam mere bahar

ek rasta mere pichhe bhage

ek rasta mere aage

bich mein chup chup khaDi hun jaise

bujhi hui bujhaart

kis ko dosh dun, jaane mujh ko

kis ne kiya akarat

aaina dekhun, baal sanwarun

lab pe hansi sajaun

gala-saDa wahi gosht ki jis par

baiThi rang chaDhaun

jaane kitni barf pighal gai

bah gaya kitna pani

kis nadiya mein DhunDun bachpan

kis dariya mein jawani

raat aae meri haDDiyan jagen

din jage main soun

apne ujaD badan se lag kar

kabhi hansun, kabhi roun

ek bhayanak sapna: aag mein lipTi jalti jaun

choli mein aDse sikkon ke sang pighalti jaun

ek mausam mere dil ke andar

ek mausam mere bahar

ek rasta mere pichhe bhage

ek rasta mere aage

raste bich main khaDi akeli

piya na sang saheli

kya jaane mujh janm-jali ne

kya apradh kiya hai

aaKHir kyun duniya ka main ne sara zahr piya hai

sari umr na jaane apne badan mein kise jiya hai

mere sath zamane!

tu ne achchha nahin kiya hai

dur khaDe mere aangan dware

pal pal pas bulaen

kaho hawaon se ab, un ko

dur bahut hi dur kahin le jaen

jhuT ki ye kali diwaren

jhuT ka farsh aur chhat hai

jhuT ka bistar jhuT ke sathi

jhuT ki har sangat hai

jhuT bichhaun, jhuT lapeTun

jhuT utarun, pahnun

jhuT pahan kar jism ke virane mein dauDti jaun

sach ke jugnu bol kahan hai

kab se tujhe bulaun

is lambi tarik saDak par kab tak chalti jaun

kyun nahin zehn ki diwaron se

Takraun, mar jaun

shama sarekhi pighal rahi hun

ojhal kabhi ujagar

ek mausam mere dil ke andar

ek mausam mere bahar

mujh se milne kaun aae ab in tanha rahon par

boTi boTi baT gai meri raushan chaurahon par

is gahre sannaTe mein kis ko aawaz lagaun

kaun aaega madad ko meri

kya chiKHon chillaun

apne murda gosht ki chadar

oDh ke chup ho jaun

aur achanak nindon ki daldal mein gum ho jaun

kisi ke hath na aaun

KHud ko main KHud DhunDne niklun

lekin kahin na paun