sawal

saḌkoñ pe sannāTā hai aur

jin umroñ meñ

maa.eñ beToñ ke cigarette se sulge kapḌoñ kī jeboñ meñ

koī mahaktā ḳhat dekheñ to

hañs kar vāpas rakh detī thiiñ

in umroñ meñ

ab maaoñ ko

jismoñ meñ bārūd kī bū aur lāshoñ meñ sikke ke chhed rulā dete haiñ

dil par zaḳhm uThāne vaalī umr meñ laḌke

kamre kī dīvār ke ghaav

bandūqoñ kī tasvīroñ se Dhak dene par

āmāda kaise hote haiñ

fatvoñ kī dhāreñ zehnoñ ko

āḳhir kaise kund kartī haiñ

jannat meñ jo kuchh bhī hogā

is duniyā ko kaun jahannum kar detā hai

maaoñ kī godoñ se uTh kar

maut kī god meñ sone vaalo

kuchh to bolo

saDkon pe sannaTa hai aur

jin umron mein

maen beTon ke cigarette se sulge kapDon ki jebon mein

koi mahakta KHat dekhen to

hans kar wapas rakh deti thin

in umron mein

ab maon ko

jismon mein barud ki bu aur lashon mein sikke ke chhed rula dete hain

dil par zaKHm uThane wali umr mein laDke

kamre ki diwar ke ghaw

banduqon ki taswiron se Dhak dene par

aamada kaise hote hain

fatwon ki dhaaren zehnon ko

aaKHir kaise kund karti hain

jannat mein jo kuchh bhi hoga

is duniya ko kaun jahannum kar deta hai

maon ki godon se uTh kar

maut ki god mein sone walo

kuchh to bolo