sayyad ki lauh-e-turbat

ai ki terā murġh-e-jāñ tār-e-nafas meñ hai asiir

ai ki terī ruuh kā taa.ir qafas meñ hai asiir

is chaman ke naġhma-pairāoñ kī āzādī to dekh

shahr jo ujḌā huā thā us kī ābādī to dekh

fikr rahtī thī mujhe jis kī vo mahfil hai yahī

sabr-o-istiqlāl kī khetī kā hāsil hai yahī

sañg-e-turbat hai mirā girvīda-e-taqrīr dekh

chashm-e-bātin se zarā is lauh kī tahrīr dekh

mudda.ā terā agar duniyā meñ hai ta.alīm-e-dīñ

tark-e-duniyā qaum ko apnī na sikhlānā kahīñ

vā na karnā firqa-bandī ke liye apnī zabāñ

chhup ke hai baiThā huā hañgāma-e-mahshar yahāñ

vasl ke asbāb paidā hoñ tirī tahrīr se

dekh koī dil na dukh jaa.e tirī taqrīr se

mahfil-e-nau meñ purānī dāstānoñ ko na chheḌ

rañg par jo ab na aa.eñ un fasānoñ ko na chheḌ

tū agar koī mudabbir hai to sun merī sadā

hai dilerī dast-e-arbāb-e-siyāsat kā asā

arz-e-matlab se jhijak jaanā nahīñ zebā tujhe

nek hai niyyat agar terī to kyā parvā tujhe

banda-e-momin kā dil bīm-o-riyā se paak hai

quvvat-e-farmāñ-ravā ke sāmne bebāk hai

ho agar hāthoñ meñ tere ḳhām-e-mojiz raqam

shīsha-e-dil ho agar terā misāl-e-jām-e-jam

paak rakh apnī zabāñ tilmīz-e-rahmānī hai tū

ho na jaa.e dekhnā terī sadā be-ābrū

sone vāloñ ko jagā de sher ke e.ajāz se

ḳhirman-e-bātil jalā de sho.ala-e-āvāz se

ai ki tera murgh-e-jaan tar-e-nafas mein hai asir

ai ki teri ruh ka tair qafas mein hai asir

is chaman ke naghma-pairaon ki aazadi to dekh

shahr jo ujDa hua tha us ki aabaadi to dekh

fikr rahti thi mujhe jis ki wo mahfil hai yahi

sabr-o-istiqlal ki kheti ka hasil hai yahi

sang-e-turbat hai mera girwida-e-taqrir dekh

chashm-e-baatin se zara is lauh ki tahrir dekh

muddaa tera agar duniya mein hai talim-e-din

tark-e-duniya qaum ko apni na sikhlana kahin

wa na karna firqa-bandi ke liye apni zaban

chhup ke hai baiTha hua hangama-e-mahshar yahan

wasl ke asbab paida hon teri tahrir se

dekh koi dil na dukh jae teri taqrir se

mahfil-e-nau mein purani dastanon ko na chheD

rang par jo ab na aaen un fasanon ko na chheD

tu agar koi mudabbir hai to sun meri sada

hai dileri dast-e-arbab-e-siyasat ka asa

arz-e-matlab se jhijak jaana nahin zeba tujhe

nek hai niyyat agar teri to kya parwa tujhe

banda-e-momin ka dil bim-o-riya se pak hai

quwwat-e-farman-rawa ke samne bebak hai

ho agar hathon mein tere KHam-e-mojiz raqam

shisha-e-dil ho agar tera misal-e-jam-e-jam

pak rakh apni zaban tilmiz-e-rahmani hai tu

ho na jae dekhna teri sada be-abru

sone walon ko jaga de sher ke eajaz se

KHirman-e-baatil jala de shoala-e-awaz se