sex workers

saḌak kināre sTeshnoñ par

purāne koThe kī balcony meñ

hoTaloñ kī bahisht-timsāl lobbiyoñ meñ

baḌe buzurgoñ ke maqbaroñ

aur haspatāloñ ke gate ke paas

shab ga.e jo khaḌe hue haiñ

ye log kyā haiñ

sunā hai ye saare bik rahe haiñ

hasīn laḌke transgender

yā laḌkiyāñ jin ke bujhte chehroñ kī zard rangat

chamaktā make-up chhupā na paa.e

inheñ havas hai yā koī lālach

jo apnī marzī se

ḳhud ko nīlām kar rahe haiñ

mujhe kisī se bahut mohabbat huī to sochā

inheñ bhī koī pasand hogā

inheñ bhī merī tarah kisī se

bahut mohabbat huī ho shāyad

to kyoñ bhalā ye ġhalīz jismoñ ko oḌhte haiñ

ye gande mūñhoñ ko sūñghte haiñ

ye pāñch rātoñ kā karb sahte haiñ

aadhī shab ke mu’āvze meñ

ye bhar ke laate haiñ apne kānoñ meñ

ghaTiyā lafzoñ kā garm siisa

ye apne tan par bahut se ghaav liye hue haiñ

ye apne man meñ bahut se ghaav liye hue haiñ

bhalā koī hosh-mand marzī se

apnā nuqsān kyoñ karegā

mujhe mohabbat milī to sochā

agar vo sab kuchh jo kuchh sharīfoñ meñ baT gayā hai

inheñ bhī thoḌā sā mil sake to

ye apnā man-chāhā jism oḌheñ

jo in kī rūhoñ meñ bas rahā ho

jo in ke zehnoñ meñ khil rahā ho

jo in kī sāñsoñ meñ 'itr ghole

jo in ke tan-man ke ghaav bhar de

ye 'aam logoñ kī ‘izzatoñ se bane

gharoñdoñ kī samt aate

havas ke paanī ke

biphre rele sañbhālte haiñ

vo jin ke mai'de bhare hue haiñ

unheñ batā do

ye dīn-o-duniyā se māvarā haiñ

inheñ jahannum se mat Darā.eñ

ye roz apne badan jahannum meñ Dālte haiñ

ye apnī rūhoñ ko bechte haiñ

to apne jismoñ ko pālte haiñ

saDak kinare sTeshnon par

purane koThe ki balcony mein

hoTalon ki bahisht-timsal lobbiyon mein

baDe buzurgon ke maqbaron

aur haspatalon ke gate ke pas

shab gae jo khaDe hue hain

ye log kya hain

suna hai ye sare bik rahe hain

hasin laDke transgender

ya laDkiyan jin ke bujhte chehron ki zard rangat

chamakta make-up chhupa na pae

inhen hawas hai ya koi lalach

jo apni marzi se

KHud ko nilam kar rahe hain

mujhe kisi se bahut mohabbat hui to socha

inhen bhi koi pasand hoga

inhen bhi meri tarah kisi se

bahut mohabbat hui ho shayad

to kyon bhala ye ghaliz jismon ko oDhte hain

ye gande munhon ko sunghte hain

ye panch raaton ka karb sahte hain

aadhi shab ke mu’awze mein

ye bhar ke late hain apne kanon mein

ghaTiya lafzon ka garm sisa

ye apne tan par bahut se ghaw liye hue hain

ye apne man mein bahut se ghaw liye hue hain

bhala koi hosh-mand marzi se

apna nuqsan kyon karega

mujhe mohabbat mili to socha

agar wo sab kuchh jo kuchh sharifon mein baT gaya hai

inhen bhi thoDa sa mil sake to

ye apna man-chaha jism oDhen

jo in ki ruhon mein bas raha ho

jo in ke zehnon mein khil raha ho

jo in ki sanson mein 'itr ghole

jo in ke tan-man ke ghaw bhar de

ye 'am logon ki ‘izzaton se bane

gharondon ki samt aate

hawas ke pani ke

biphre rele sanbhaalte hain

wo jin ke mai'de bhare hue hain

unhen bata do

ye din-o-duniya se mawara hain

inhen jahannum se mat Daraen

ye roz apne badan jahannum mein Dalte hain

ye apni ruhon ko bechte hain

to apne jismon ko palte hain