shair

ai mire shahr ke shā.iro

mat likho

ab qasīda koī husn-e-mahbūb par

fātiha bhej do aise maktūb par

aisī nazmoñ kā kyā fā.eda jis meñ mazlūm dil kī sadā.eñ na hoñ

aise she'roñ meñ kyā soz ho jis meñ maqtūl logoñ kī aa.heñ na hoñ

ai mire shahr ke shā.iro

likhnā chāho agar

aao nauha likho

ġham kī uftād par

shahr-e-fariyād par

apne kirdār se

parda-e-vaqt par

ek nauha likho

un parindoñ pe jin ko daraḳhtoñ se bejā uḌāyā gayā

ek nauha likho

un charāġhoñ pe bhī jin ko bujhne se pahle bujhāyā gayā

shā.iro

tum vahī ho ki jin se larazte rahe zālimoñ ke qadam

misl-e-shamshīr-e-'uryāñ rahā hai hamesha tumhārā qalam

jot lo harf-e-iz.hār kī khetiyāñ sub.h-dam

baḌh ke tum hī uThā lo nā haq kā 'alam

aur nauha likho

āh-e-mazlūm kā

shakl-e-maġhmūm kā

maiñ nahīñ chāhtā

aane vaalā zamāna tumhārī ḳhamoshī pe lā'nat kare

aur malāmat kare

ai mere shahr ke shairo

mat likho

ab qasida koi husn-e-mahbub par

fatiha bhej do aise maktub par

aisi nazmon ka kya faeda jis mein mazlum dil ki sadaen na hon

aise she'ron mein kya soz ho jis mein maqtul logon ki aahen na hon

ai mere shahr ke shairo

likhna chaho agar

aao nauha likho

gham ki uftad par

shahr-e-fariyaad par

apne kirdar se

parda-e-waqt par

ek nauha likho

un parindon pe jin ko daraKHton se beja uDaya gaya

ek nauha likho

un charaghon pe bhi jin ko bujhne se pahle bujhaya gaya

shairo

tum wahi ho ki jin se larazte rahe zalimon ke qadam

misl-e-shamshir-e-'uryan raha hai hamesha tumhaara qalam

jot lo harf-e-izhaar ki khetiyan subh-dam

baDh ke tum hi uTha lo na haq ka 'alam

aur nauha likho

aah-e-mazlum ka

shakl-e-maghmum ka

main nahin chahta

aane wala zamana tumhaari KHamoshi pe la'nat kare

aur malamat kare