shairi ka janaza

ek shab to tab’-e-mauzūñ ne uḌā dī niiñd bhī

aur dimāġh o qalb kī rag rag phaḌakne lag ga.ī

zehn par chhāne lagīñ phir shā'irī kī badliyāñ

‘ālam-e-mash.hūd kā chhupne lagā phir āsmāñ

āmad-e-mauzūñ thī yā baḌhtā huā sailāb thā

she’r kāġhaz par nikharne ke liye betāb thā

ik talātum sā bapā thā bahr-e-ehsāsāt meñ

be-sabātī hukmrāñ thī ‘ālam-e-isbāt meñ

tab' kahtī thī zamāne bhar kī āñkheñ khol duuñ

zarra-o-ḳhurshīd mīzān-e-suḳhan meñ taul duuñ

zarre zarre ko sunā duuñ aaj paiġhām-e-hayāt

ik ishāre se badal duuñ ye nizām-e-kā.enāt

gumbad-e-gardūñ pe ab taḳh.īl kī parvāz thī

dil kī dhaḌkan jaise isrāfīl kī āvāz thī

ḳhāma thā yā ki koī raḳhsh-e-sabā-raftār thā

jo taḳhayyul kī havā se barsar-e-paikār thā

daf'atan do narm-o-nāzuk haath shānoñ se lage

barq-e-ḳhirman-soz jaise āshiyāne par gire

muḌ ke dekhā to khaḌā hai ek tifl-e-ḳhurd-sāl

jis kī āñkhoñ meñ tamanna jis kī nazroñ meñ savāl

madrase kī fees pencil pen kitābeñ copiyāñ

mushtamil thā chand ashyā par nigāhoñ kā bayāñ

aur phir us tifl kī sūrat pe gahrī soch thī

jo mujhe ik dā’vat-e-fikr-o-amal sī de ga.ī

maiñ ne dekhā zehn meñ ik geñd hai laTTū bhī hai

aur pencil chhīlne kā ḳhushnumā chāqū bhī hai

ḳhūbsūrat hat hai ik ḳhushnumā poshāk hai

zehn kī gardish kā mehvar Trā.ikal kā chaak hai

TikTikī sī bāñdh kar kuchh der tak dekhā kiyā

maiñ isī 'ālam meñ phir mahsūs yuuñ karne lagā

ik jamūdī kaifiyat chhāne lagī idrāk par

'arsh se girtā ho jaise koī farsh-e-ḳhāk par

zehn se josh-e-suḳhan kā rang kam hone lagā

tab’-e-mauzūñ kā sar-e-taslīm ḳham hone lagā

ek māyūsī dimāġh-o-qalb par chhāne lagī

aur jamāhī par jamāhī niiñd sī aane lagī

phir palaT kar kī nazar apnī adhūrī nazm par

ek bijlī sī girī mere dimāġh-o-qalb par

maut kī thī hukmrānī paikar-e-ehsās par

shā'irī kā thā janāza bistar-e-qirtās par

ek shab to tab’-e-mauzun ne uDa di nind bhi

aur dimagh o qalb ki rag rag phaDakne lag gai

zehn par chhane lagin phir sha'iri ki badliyan

‘alam-e-mashhud ka chhupne laga phir aasman

aamad-e-mauzun thi ya baDhta hua sailab tha

she’r kaghaz par nikharne ke liye betab tha

ek talatum sa bapa tha bahr-e-ehsasat mein

be-sabaati hukmran thi ‘alam-e-isbaat mein

tab' kahti thi zamane bhar ki aankhen khol dun

zarra-o-KHurshid mizan-e-suKHan mein taul dun

zarre zarre ko suna dun aaj paigham-e-hayat

ek ishaare se badal dun ye nizam-e-kaenat

gumbad-e-gardun pe ab taKHil ki parwaz thi

dil ki dhaDkan jaise israfil ki aawaz thi

KHama tha ya ki koi raKHsh-e-saba-raftar tha

jo taKHayyul ki hawa se barsar-e-paikar tha

daf'atan do narm-o-nazuk hath shanon se lage

barq-e-KHirman-soz jaise aashiyane par gire

muD ke dekha to khaDa hai ek tifl-e-KHurd-sal

jis ki aankhon mein tamanna jis ki nazron mein sawal

madrase ki fees pencil pen kitaben copiyan

mushtamil tha chand ashya par nigahon ka bayan

aur phir us tifl ki surat pe gahri soch thi

jo mujhe ek da’wat-e-fikr-o-amal si de gai

main ne dekha zehn mein ek gend hai laTTu bhi hai

aur pencil chhilne ka KHushnuma chaqu bhi hai

KHubsurat hat hai ek KHushnuma poshak hai

zehn ki gardish ka mehwar Traikal ka chaak hai

TikTiki si bandh kar kuchh der tak dekha kiya

main isi 'alam mein phir mahsus yun karne laga

ek jamudi kaifiyat chhane lagi idrak par

'arsh se girta ho jaise koi farsh-e-KHak par

zehn se josh-e-suKHan ka rang kam hone laga

tab’-e-mauzun ka sar-e-taslim KHam hone laga

ek mayusi dimagh-o-qalb par chhane lagi

aur jamahi par jamahi nind si aane lagi

phir palaT kar ki nazar apni adhuri nazm par

ek bijli si giri mere dimagh-o-qalb par

maut ki thi hukmrani paikar-e-ehsas par

sha'iri ka tha janaza bistar-e-qirtas par