shaer aur masKHare

hamāre yahāñ aam taur par

har mauqe par

shā.er aur masḳhare

ek jaisī kursiyoñ par baiThte haiñ

aur kursiyoñ tak aane ke liye

ek hī rāste se guzarte haiñ

aur is rāste se pahle

ek hī ziine upar chaḌhte haiñ

shā.er aur masḳhare saath saath chalte haiñ

chalte chalte masḳhara zor zor se hañstā hai

shā.er rotā hai aur ham

donoñ kī āvāzeñ saath saath sunte haiñ

aur bhuul jaate haiñ dhyān hī nahīñ dete

is baat par ki in meñ se

shā.er kī āvāz kaun sī hai aur masḳhare kī kaun sī

aur is baat par ki hameñ

masḳhare kī hañsī par tavajjoh denī chāhiye

yā shā.er ke āñsuoñ par

aur is baat par ki hameñ

shā.iroñ masḳharoñ aur kursiyoñ meñ

koī farq mahsūs nahīñ hotā

hamare yahan aam taur par

har mauqe par

shaer aur masKHare

ek jaisi kursiyon par baiThte hain

aur kursiyon tak aane ke liye

ek hi raste se guzarte hain

aur is raste se pahle

ek hi zine upar chaDhte hain

shaer aur masKHare sath sath chalte hain

chalte chalte masKHara zor zor se hansta hai

shaer rota hai aur hum

donon ki aawazen sath sath sunte hain

aur bhul jate hain dhyan hi nahin dete

is baat par ki in mein se

shaer ki aawaz kaun si hai aur masKHare ki kaun si

aur is baat par ki hamein

masKHare ki hansi par tawajjoh deni chahiye

ya shaer ke aansuon par

aur is baat par ki hamein

shairon masKHaron aur kursiyon mein

koi farq mahsus nahin hota