shaer

fitna-e-ḳhufta jagā.e us ghaḌī kis kī majāl

qaid haiñ shahzādiyāñ koī nahīñ pursān-e-hāl

in ġharīboñ kī madad par koī āmāda nahīñ

ek shā.er hai yahāñ lekin vo shahzāda nahīñ

āhūoñ kī surmagīñ palkeñ fazā par hukmarāñ

chhā.ī haiñ arz o samā par āhinīñ sī jāliyāñ

duur se kohsār o vaadī par ye hotā hai gumāñ

uuñT haiñ baiThe hue utrā huā hai kārvāñ

yā asar haiñ āsmān-e-pīr par barsāt ke

ḳhema-e-bosīda meñ paivand haiñ bānāt ke

aur is ḳheme ke andar zindagī soī huī

tīrgī soī huī tābindagī soī huī

ai 'hafīz' in niiñd ke mātoñ kī manzil se nikal

kaam hai darpesh dām-e-dīda-o-dil se nikal

dīda-o-dil ko bhī ġhaflat ke shabistāñ se nikāl

ye jo ḳhāmoshī kī zanjīreñ haiñ in ko toḌ Daal

sub.h karne ke liye phir hāv-hū darkār hai

shukr kar sotī huī duniyā meñ tū bedār hai

fitna-e-KHufta jagae us ghaDi kis ki majal

qaid hain shahzadiyan koi nahin pursan-e-haal

in gharibon ki madad par koi aamada nahin

ek shaer hai yahan lekin wo shahzada nahin

aahuon ki surmagin palken faza par hukmaran

chhai hain arz o sama par aahinin si jaliyan

dur se kohsar o wadi par ye hota hai guman

unT hain baiThe hue utra hua hai karwan

ya asar hain aasman-e-pir par barsat ke

KHema-e-bosida mein paiwand hain banat ke

aur is KHeme ke andar zindagi soi hui

tirgi soi hui tabindagi soi hui

ai 'hafiz' in nind ke maton ki manzil se nikal

kaam hai darpesh dam-e-dida-o-dil se nikal

dida-o-dil ko bhi ghaflat ke shabistan se nikal

ye jo KHamoshi ki zanjiren hain in ko toD Dal

subh karne ke liye phir haw-hu darkar hai

shukr kar soti hui duniya mein tu bedar hai