shaeraat aur shair mein kabaDDi

uktā chuke the lagtā hai apnī hayāt se

shā.ir kabaDDī khel ga.e shā.erāt se

nau-mashq kohna-mashq javāñ-fikr shā.erāt

qurbān jin pe hote the maf.ūl fā.ilāt

aur dūsrī taraf the sabhī fan ke hoshiyār

lekin is hādse ne kiyā un ko sharmsār

shā.ir jo shā.erāt kī paalī kī had meñ thā

dauḌā ke shā.erāt ne us ko pakaḌ liyā

hāthoñ meñ shā.erāt ke phañs kar akaḌ gayā

lo shā.ir-e-jadīd kā misrā sukaḌ gayā

aa.e kabaDDī bolne shā.ir buzurgvār

pahle hī jin kā dāman-e-hasrat thā taar taar

the majmūe janāb ke ġhamnāk ashk-bār

public ne jin ko hoot kiyā thā hazār baar

phir shā.era ne dast-e-hinā.ī chakhā diye

in shā.ir-e-buzurg ke chhakke chhuḌā diye

paalī meñ shā.erāt kī tū tū kī luuT thī

ḳhālis ġhazal ke shāi.r-e-āzam ko chhūT thī

lekin ġhazal ke sher samajh ke vo uḌ ga.e

āḳhir janāb paalī ke pīchhe pakaḌ ga.e

lo mashq-e-shā.era bhī ga.ī phūñk mārne

ukhḌī jo saañs lag ga.ī zulfeñ sañvārne

ik shā.ir-e-jadīd ne chāhā dabochnā

us shā.era ne kar diyā start nochnā

dekhā jo dūsrī ne to himmat baTor kar

aafat se ban ke chhā ga.ī pairoñ ko joḌ kar

phir referē kā kaam yahāñ end ho gayā

do party ke biich bachāv meñ kho gayā

sab shā.eqīn-e-sher-o-adab bhāgne lage

sun sun ke shor sote hue jāgne lage

shā.ir the un kā haal bhī ho kar rahā ajiib

qismat pe apnī rotā rahā shā.ir-e-ġharīb

kitnī qamīz phaT ga.iiñ patlūn phaT ga.e

puure badan kahīñ na kahīñ se simaT ga.e

ghabrā ke ol-fol bhī bakne lage janāb

un se kabaDDī khel ke izzat huī ḳharāb

sab ne qasam ye khaa.ī ki ab saarī zindagī

janjāl meñ phañsī huī hogī na shā.erī

ai 'shaiḳh' shā.erī to sharāfat se kījiye

ye ḳhidmat-e-adab hai liyāqat se kījiye

ukta chuke the lagta hai apni hayat se

shair kabaDDi khel gae shaeraat se

nau-mashq kohna-mashq jawan-fikr shaeraat

qurban jin pe hote the maful failat

aur dusri taraf the sabhi fan ke hoshiyar

lekin is hadse ne kiya un ko sharmsar

shair jo shaeraat ki pali ki had mein tha

dauDa ke shaeraat ne us ko pakaD liya

hathon mein shaeraat ke phans kar akaD gaya

lo shair-e-jadid ka misra sukaD gaya

aae kabaDDi bolne shair buzurgwar

pahle hi jin ka daman-e-hasrat tha tar tar

the majmue janab ke ghamnak ashk-bar

public ne jin ko hoot kiya tha hazar bar

phir shaera ne dast-e-hinai chakha diye

in shair-e-buzurg ke chhakke chhuDa diye

pali mein shaeraat ki tu tu ki luT thi

KHalis ghazal ke shair-e-azam ko chhuT thi

lekin ghazal ke sher samajh ke wo uD gae

aaKHir janab pali ke pichhe pakaD gae

lo mashq-e-shaera bhi gai phunk marne

ukhDi jo sans lag gai zulfen sanwarne

ek shair-e-jadid ne chaha dabochna

us shaera ne kar diya start nochna

dekha jo dusri ne to himmat baTor kar

aafat se ban ke chha gai pairon ko joD kar

phir referee ka kaam yahan end ho gaya

do party ke bich bachaw mein kho gaya

sab shaeqin-e-sher-o-adab bhagne lage

sun sun ke shor sote hue jagne lage

shair the un ka haal bhi ho kar raha ajib

qismat pe apni rota raha shair-e-gharib

kitni qamiz phaT gain patlun phaT gae

pure badan kahin na kahin se simaT gae

ghabra ke ol-fol bhi bakne lage janab

un se kabaDDi khel ke izzat hui KHarab

sab ne qasam ye khai ki ab sari zindagi

janjal mein phansi hui hogi na shaeri

ai 'shaiKH' shaeri to sharafat se kijiye

ye KHidmat-e-adab hai liyaqat se kijiye