shair

aaj phir sañvlā rahā hai āriz-e-rū-e-hayāt

maut ke qānūn par hai zindagī kā garm haath

jhilmilātā jā rahā hai tund āñdhī meñ charāġh

mil rahā hai ḳhuun ke qatroñ se manzil kā surāġh

aa rahā hai fāqa-kash mazdūr ke chehre pe rañg

khurdure hāthoñ se ab Takrā rahe haiñ jām-o-sañg

chhuT rahī hai nabz-e-hastī aa rahā hai inqalāb

uTh rahā hai aaj farsūda aqā.ed kā suhāg

ziist kī gardan meñ hai pazhmurda afsānoñ kā haar

maut ke shānoñ pe hai salmā-e-getī kā nikhār

ban rahī haiñ ab zamāna meñ na.ī pagDañDiyāñ

jin se guzregā javāñ fikroñ kā pahlā kārvāñ

dāstān-e-ahd-e-pārīna hai zauq-e-rang-o-bū

ab chhalaktā hai ḳhum-o-sāġhar se insāñ kā lahū

bazm-e-husn-o-nāz kī dildāriyāñ bhī so ga.iiñ

hijr kī rātoñ kī vo be-ḳhūbiyāñ bhī ho ga.iiñ

aaj phir sanwla raha hai aariz-e-ru-e-hayat

maut ke qanun par hai zindagi ka garm hath

jhilmilata ja raha hai tund aandhi mein charagh

mil raha hai KHun ke qatron se manzil ka suragh

aa raha hai faqa-kash mazdur ke chehre pe rang

khurdure hathon se ab Takra rahe hain jam-o-sang

chhuT rahi hai nabz-e-hasti aa raha hai inqalab

uTh raha hai aaj farsuda aqaed ka suhag

zist ki gardan mein hai pazhmurda afsanon ka haar

maut ke shanon pe hai salma-e-geti ka nikhaar

ban rahi hain ab zamana mein nai pagDanDiyan

jin se guzrega jawan fikron ka pahla karwan

dastan-e-ahd-e-parina hai zauq-e-rang-o-bu

ab chhalakta hai KHum-o-saghar se insan ka lahu

bazm-e-husn-o-naz ki dildariyan bhi so gain

hijr ki raaton ki wo be-KHubiyan bhi ho gain