shair aur musawwir

rang bhartī hai fazāoñ meñ tirī fikr-e-rasā

husn kā paikar nazar aatī hai har mauj-e-sabā

dekh kar pur-haul sannāTe meñ ujḌī bastiyāñ

ġham se rah jaatā huuñ dāñtoñ meñ dabā kar uñgliyāñ

terī zulfeñ badliyāñ āñkheñ sitāroñ kī tarah

chaal meñ haiñ mastiyāñ rangat sharāroñ kī tarah

rukne lagte haiñ ujāloñ ke usī dam jaise paañv

jis taraf pagDanDiyoñ par paḌtī hai gāgar kī chhāñv

muztarib hotā hai is manzar se dil insān kā

dhaḌkanoñ par dil kī hotā hai gumāñ tūfān kā

ai musavvir tujh ko shā.ir ne isī par maat dī

khīñch bhī saktā hai tū tasvīr ehsāsāt kī

kaash de saktā tujhe husn-e-basīrat terā fan

har muraqqa.a terā ban jaatā ḳhud apnī anjuman

kaun hai qaa.il tirī is shoḳhi-e-tahrīr kā

tū musavvir hī nahīñ jazbāt kī tasvīr kā

rang bharti hai fazaon mein teri fikr-e-rasa

husn ka paikar nazar aati hai har mauj-e-saba

dekh kar pur-haul sannaTe mein ujDi bastiyan

gham se rah jata hun danton mein daba kar ungliyan

teri zulfen badliyan aankhen sitaron ki tarah

chaal mein hain mastiyan rangat shararon ki tarah

rukne lagte hain ujalon ke usi dam jaise panw

jis taraf pagDanDiyon par paDti hai gagar ki chhanw

muztarib hota hai is manzar se dil insan ka

dhaDkanon par dil ki hota hai guman tufan ka

ai musawwir tujh ko shair ne isi par mat di

khinch bhi sakta hai tu taswir ehsasat ki

kash de sakta tujhe husn-e-basirat tera fan

har muraqqa tera ban jata KHud apni anjuman

kaun hai qail teri is shoKHi-e-tahrir ka

tu musawwir hi nahin jazbaat ki taswir ka