shair ka dil

mudda.ī tū ne abhī dekhā nahīñ shā.ir kā dil

jalva-hā-e-rang-o-bū hote haiñ jis meñ muntaqil

dil nahīñ ik mustaqil ā.īna hai jazbāt kā

aks khiñch aatā hai jis meñ saare maujūdāt kā

kaun shā.ir jis kā siina mahram-e-rāz-e-hayāt

kaun shā.ir jis ke qālib meñ hai rūh-e-kā.enāt

tarjumān-e-kun-fakāñ jis kā lab-e-ejāz hai

jis kī hastī par yahāñ qudrat ko sau-sau naaz hai

kahiye jis kī quvvat-e-taḳh.īl ko āfāq-gīr

arsh-o-farsh-o-kursī-o-lauh-o-qalam jis meñ asiir

sau tarah ke soz-e-pinhāñ jis ke har ik saaz meñ

husn jaise karvaTeñ letā hai ḳhvāb-e-nāz meñ

Dar use kyā intiqām-e-gardish-e-ayyām se

jo yahāñ vāqif hai har āġhāz se anjām se

gūñjtā hai zindagī kā giit jis ke raag meñ

jo hamesha kuud paḌtā hai parā.ī aag meñ

jis kā maz.hab amn-jūī jis kā mashrab sulh-e-kul

jis ke naġhmoñ kī latāfat hai javāb-e-barg-e-gul

jis kī tar-dāmāniyāñ behtar haiñ zohd-e-ḳhushk se

fikr kī ḳhushbū hai jis kī tez bū-e-mushk se

TūTnā koh-e-girāñ kā jis ke aage be-vaqār

TuuT kar shīshe kā TukḌā jis ko kar de be-qarār

ahl-e-zāhir kab samajh sakte haiñ ye rāz-o-niyāz

ashk hai jis kā vuzū aur dard hai jis kī namāz

Daal kar sho.aloñ meñ is ko koī kar le is kī jāñch

jism to jal jā.egā par aa.egī dil par na aañch

zauq-e-irfāñ hai tujhe to jā kisī shā.ir se mil

mudda.ī tū ne abhī dekhā nahīñ shā.ir kā dil

muddai tu ne abhi dekha nahin shair ka dil

jalwa-ha-e-rang-o-bu hote hain jis mein muntaqil

dil nahin ek mustaqil aaina hai jazbaat ka

aks khinch aata hai jis mein sare maujudat ka

kaun shair jis ka sina mahram-e-raaz-e-hayat

kaun shair jis ke qalib mein hai ruh-e-kaenat

tarjuman-e-kun-fakan jis ka lab-e-ejaz hai

jis ki hasti par yahan qudrat ko sau-sau naz hai

kahiye jis ki quwwat-e-taKHil ko aafaq-gir

arsh-o-farsh-o-kursi-o-lauh-o-qalam jis mein asir

sau tarah ke soz-e-pinhan jis ke har ek saz mein

husn jaise karwaTen leta hai KHwab-e-naz mein

Dar use kya intiqam-e-gardish-e-ayyam se

jo yahan waqif hai har aaghaz se anjam se

gunjta hai zindagi ka git jis ke rag mein

jo hamesha kud paDta hai parai aag mein

jis ka mazhab amn-jui jis ka mashrab sulh-e-kul

jis ke naghmon ki latafat hai jawab-e-barg-e-gul

jis ki tar-damaniyan behtar hain zohd-e-KHushk se

fikr ki KHushbu hai jis ki tez bu-e-mushk se

TuTna koh-e-giran ka jis ke aage be-waqar

TuT kar shishe ka TukDa jis ko kar de be-qarar

ahl-e-zahir kab samajh sakte hain ye raaz-o-niyaz

ashk hai jis ka wuzu aur dard hai jis ki namaz

Dal kar shoalon mein is ko koi kar le is ki jaanch

jism to jal jaega par aaegi dil par na aanch

zauq-e-irfan hai tujhe to ja kisi shair se mil

muddai tu ne abhi dekha nahin shair ka dil