shair ka tarana

mahram-e-shabnam rafīq-e-lāla-e-sahrā huuñ maiñ

ham-nashīñ-e-yāsmīn-o-nargis-e-shahlā huuñ maiñ

chāñd aur sūraj kā hamdam huuñ falak-paimā huuñ maiñ

aaj tak mahv-e-talāsh-e-fitrat-e-kubrā huuñ maiñ

barbat-e-qudrat ke naġhme ishrat-e-daurāñ ke raag

kyā bujhā sakte haiñ mere sīna-e-sozāñ kī aag

ḳhaak se paidā hue gulhā-e-tar mere liye

os kī būñdeñ nahīñ la.al-o-gohar mere liye

hai jahāñ meñ husn-e-fitrat jalva-gar mere liye

rang-o-nig.hat kaif-o-kam tāj-o-kamar mere liye

hai azal se mere pahlū meñ dil-e-momin nihād

merī nazreñ toḌ detī haiñ tilism-e-barq-o-bād

zalzale hoñ yā kavākib sab mire zer-e-nagīñ

khol saktā huuñ maiñ qufl-e-āsmāñ bāb-e-zamīñ

merā dil ratl-e-girāñ merī nigāheñ dūrbīñ

mere qadmoñ par jhukā.ī māh-pāroñ ne jabīñ

ishq-o-mastī kā rabāb-e-zar-fishāñ rakhtā huuñ maiñ

āstīnoñ meñ yad-e-baizā nihāñ rakhtā huuñ maiñ

bhar diyā maiñ ne ayāġh-e-lāla meñ ḳhūn-e-bahār

jābir-o-sarkash anāsir par hai merā iḳhtiyār

haiñ mire ash.ār dast-e-ġhaib ke naqsh-o-nigār

hūryān-e-ḳhuld ko ab tak hai merā intizār

zulmat-e-afsurda ko maiñ ne atā kī hai chamak

bijliyoñ ke dosh par kartā huuñ maiñ sair-e-falak

is tarah kohsār se aatī hai jū-e-narm-rau

abr ke rauzan se goyā jhāñktā hai māh-e-nau

mahram-e-shabnam rafiq-e-lala-e-sahra hun main

ham-nashin-e-yasmin-o-nargis-e-shahla hun main

chand aur suraj ka hamdam hun falak-paima hun main

aaj tak mahw-e-talash-e-fitrat-e-kubra hun main

barbat-e-qudrat ke naghme ishrat-e-dauran ke rag

kya bujha sakte hain mere sina-e-sozan ki aag

KHak se paida hue gulha-e-tar mere liye

os ki bunden nahin lal-o-gohar mere liye

hai jahan mein husn-e-fitrat jalwa-gar mere liye

rang-o-nighat kaif-o-kam taj-o-kamar mere liye

hai azal se mere pahlu mein dil-e-momin nihad

meri nazren toD deti hain tilism-e-barq-o-baad

zalzale hon ya kawakib sab mere zer-e-nagin

khol sakta hun main qufl-e-asman bab-e-zamin

mera dil ratl-e-giran meri nigahen durbin

mere qadmon par jhukai mah-paron ne jabin

ishq-o-masti ka rabab-e-zar-fishan rakhta hun main

aastinon mein yad-e-baiza nihan rakhta hun main

bhar diya main ne ayagh-e-lala mein KHun-e-bahaar

jabir-o-sarkash anasir par hai mera iKHtiyar

hain mere ashaar dast-e-ghaib ke naqsh-o-nigar

huryan-e-KHuld ko ab tak hai mera intizar

zulmat-e-afsurda ko main ne ata ki hai chamak

bijliyon ke dosh par karta hun main sair-e-falak

is tarah kohsar se aati hai ju-e-narm-rau

abr ke rauzan se goya jhankta hai mah-e-nau