shair

kaun hai jis kī sisaktī huī fariyādoñ ne

mere ehsās ke har taar meñ larzish bhar dī

kis kī āvāz se larzāñ hai har ik tār-e-hayāt

kis kī aahoñ ne mire ḳhuun meñ sozish bhar dī

haañ vahī jis ne kabhī raat ke sannāTe meñ

apne armānoñ kā ik ḳhvāb sajā rakkhā thā

jis ne āñdhī ke sanakte hue jhoñkoñ meñ nadīm

ik charāġh-e-shab-e-ummīd jalā rakhā thā

us kī duniyā meñ garajte rahe hālāt ke abr

us ke ākāsh pe chhāyā kiye kaale bādal

sar uThā.e hue hañstā huā tūfānoñ par

us ke sapnoñ kā banāyā huā vo rang-mahal

ab bhī us ke rag-o-pai meñ vahī jaulāñ hai lahū

jis ke sho.aloñ se dahak uThte haiñ shāhī aivāñ

us ke sulge hue jazboñ meñ vo garmī hai ki aaj

āmriyat ke kaleje se nikaltā hai dhuāñ

kaun hai jis ki sisakti hui fariyaadon ne

mere ehsas ke har tar mein larzish bhar di

kis ki aawaz se larzan hai har ek tar-e-hayat

kis ki aahon ne mere KHun mein sozish bhar di

han wahi jis ne kabhi raat ke sannaTe mein

apne armanon ka ek KHwab saja rakkha tha

jis ne aandhi ke sanakte hue jhonkon mein nadim

ek charagh-e-shab-e-ummid jala rakha tha

us ki duniya mein garajte rahe haalat ke abr

us ke aakash pe chhaya kiye kale baadal

sar uThae hue hansta hua tufanon par

us ke sapnon ka banaya hua wo rang-mahal

ab bhi us ke rag-o-pai mein wahi jaulan hai lahu

jis ke shoalon se dahak uThte hain shahi aiwan

us ke sulge hue jazbon mein wo garmi hai ki aaj

aamriyat ke kaleje se nikalta hai dhuan