شاعر

کون ہے جس کی سسکتی ہوئی فریادوں نے

میرے احساس کے ہر تار میں لرزش بھر دی

کس کی آواز سے لرزاں ہے ہر اک تار حیات

کس کی آہوں نے مرے خون میں سوزش بھر دی

ہاں وہی جس نے کبھی رات کے سناٹے میں

اپنے ارمانوں کا اک خواب سجا رکھا تھا

جس نے آندھی کے سنکتے ہوئے جھونکوں میں ندیم

اک چراغ شب امید جلا رکھا تھا

اس کی دنیا میں گرجتے رہے حالات کے ابر

اس کے آکاش پہ چھایا کئے کالے بادل

سر اٹھائے ہوئے ہنستا ہوا طوفانوں پر

اس کے سپنوں کا بنایا ہوا وہ رنگ محل

اب بھی اس کے رگ و پے میں وہی جولاں ہے لہو

جس کے شعلوں سے دہک اٹھتے ہیں شاہی ایواں

اس کے سلگے ہوئے جذبوں میں وہ گرمی ہے کہ آج

آمریت کے کلیجے سے نکلتا ہے دھواں