shair

ḳhaak ke zarroñ ko tanvīr-e-nazar detā hai vo

phuul kī pattī ko lohe kā jigar detā hai vo

jab use mahmez kartī hai taḳhayyul kī adā

zulmat-e-shab ko tajallī-e-sahar detā hai vo

sāzish-e-barbādi-e-ālam jahāñ jab bhī huī

saarī duniyā jaag jaatī hai ḳhabar detā hai vo

jab rag-e-jamhūriyat ko kāTne baḌhtā hai zulm

be-gunāhī sabr kartī hai asar detā hai vo

is qadar fitrat ke husn-e-dilrubā par hai fidā

tālib-e-sar ho agar fitrat to sar detā hai vo

ḳhud tahī-dāman sahī lekin zar-e-iḳhlās se

dāman-e-tahzīb-e-insānī ko bhar detā hai vo

azmat-e-ādam se kar ke munzabit apnā suḳhan

ġham-zadoñ ko jur.at-e-zauq-e-safar detā hai vo

maut ko tasḳhīr kar ke quvvat-e-idrāk se

murdanī chehroñ ko jiine kā hunar detā hai vo

qalb-e-shā.ir ko milī haiñ ishq kī sab barkateñ

ishq hī se qalb-e-āhan mom kar detā hai vo

KHak ke zarron ko tanwir-e-nazar deta hai wo

phul ki patti ko lohe ka jigar deta hai wo

jab use mahmez karti hai taKHayyul ki ada

zulmat-e-shab ko tajalli-e-sahar deta hai wo

sazish-e-barbaadi-e-alam jahan jab bhi hui

sari duniya jag jati hai KHabar deta hai wo

jab rag-e-jamhuriyat ko kaTne baDhta hai zulm

be-gunahi sabr karti hai asar deta hai wo

is qadar fitrat ke husn-e-dilruba par hai fida

talib-e-sar ho agar fitrat to sar deta hai wo

KHud tahi-daman sahi lekin zar-e-iKHlas se

daman-e-tahzib-e-insani ko bhar deta hai wo

azmat-e-adam se kar ke munzabit apna suKHan

gham-zadon ko jurat-e-zauq-e-safar deta hai wo

maut ko tasKHir kar ke quwwat-e-idrak se

murdani chehron ko jine ka hunar deta hai wo

qalb-e-shair ko mili hain ishq ki sab barkaten

ishq hi se qalb-e-ahan mom kar deta hai wo