shair ki duniya

gul-o-gulzār ke manzar vo sheroñ meñ dikhātā hai

vo apne hī ḳhayāloñ kī na.ī duniyā basātā hai

fazā-e-qudrat-e-haq meñ sadā ābād hotā hai

ḳhudā kī qudratoñ ko dekh kar dil shaad hotā hai

vo goyā ek kuuze meñ hī dariyā band kartā hai

vo do lafzoñ meñ qudrat kā tamāshā band kartā hai

gulistāñ meñ kabhī bulbul-sifat mahv-e-tarannum hai

kabhī mahfil meñ jā jā kar vo masrūf-e-takallum hai

sadā rāh-e-ḳhudā meñ baḳhshne kā hai ḳhayāl us ko

kafan ke vāste kauḌī bhī rakhnī hai muhāl us ko

kisī ko dard meñ dekhe to dil meñ dard paidā ho

kisī majbūrī-e-hālat pe āh-e-sard paidā ho

nahīñ dil meñ tamanna us ke kuchh shān-e-amīrī kī

sadā dil shaad rakhtī hai use lazzat faqīrī kī

zamāne ne nahīñ dekhā koī ḳhuddār shā.ir sā

ġharaz koī nahīñ ehsān-nā-bardār shā.ir sā

rifāqat desh kī kartā hai us kā āshnā ban kar

dikhātā qaum ko rasta hai us kā rahnumā ban kar

gul-o-gulzar ke manzar wo sheron mein dikhata hai

wo apne hi KHayalon ki nai duniya basata hai

faza-e-qudrat-e-haq mein sada aabaad hota hai

KHuda ki qudraton ko dekh kar dil shad hota hai

wo goya ek kuze mein hi dariya band karta hai

wo do lafzon mein qudrat ka tamasha band karta hai

gulistan mein kabhi bulbul-sifat mahw-e-tarannum hai

kabhi mahfil mein ja ja kar wo masruf-e-takallum hai

sada rah-e-KHuda mein baKHshne ka hai KHayal us ko

kafan ke waste kauDi bhi rakhni hai muhaal us ko

kisi ko dard mein dekhe to dil mein dard paida ho

kisi majburi-e-haalat pe aah-e-sard paida ho

nahin dil mein tamanna us ke kuchh shan-e-amiri ki

sada dil shad rakhti hai use lazzat faqiri ki

zamane ne nahin dekha koi KHuddar shair sa

gharaz koi nahin ehsan-na-bardar shair sa

rifaqat desh ki karta hai us ka aashna ban kar

dikhata qaum ko rasta hai us ka rahnuma ban kar