شاعر کی دنیا

گل و گلزار کے منظر وہ شعروں میں دکھاتا ہے

وہ اپنے ہی خیالوں کی نئی دنیا بساتا ہے

فضائے قدرت حق میں سدا آباد ہوتا ہے

خدا کی قدرتوں کو دیکھ کر دل شاد ہوتا ہے

وہ گویا ایک کوزے میں ہی دریا بند کرتا ہے

وہ دو لفظوں میں قدرت کا تماشا بند کرتا ہے

گلستاں میں کبھی بلبل صفت ہے محو ترنم ہے

کبھی محفل میں جا جا کر وہ مصروف تکلم ہے

سدا راہ خدا میں بخشنے کا ہے خیال اس کو

کفن کے واسطے کوڑی بھی رکھنی ہے محال اس کو

کسی کو درد میں دیکھے تو دل میں درد پیدا ہو

کسی مجبوریٔ حالت پہ آہ سرد پیدا ہو

نہیں دل میں تمنا اس کے کچھ شان امیری کی

سدا دل شاد رکھتی ہے اسے لذت فقیری کی

زمانہ نے نہیں دیکھا کوئی خوددار شاعر سا

غرض کوئی نہیں احسان نا بردار شاعر سا

رفاقت دیش کی کرتا ہے اس کا آشنا بن کر

دکھاتا قوم کو رستہ ہے اس کا رہنما بن کر