shair ki tamanna

ai malika-e-afkār daraḳhshān-e-taḳhayyul

ai chāñdnī-e-zulmat-e-shab jān-e-taġhazzul

kis naam kis alfāz se maiñ tujh ko navāzūñ

kis tarah tujhe nazm ke sāñche meñ Dhālūñ

maḳhmal sā badan nuqta-o-ḳhat phuul hai jis kā

ye tarz-e-nigārish ki nazar jhuum rahī hai

ye chāñd sitāre haiñ tirī raah meñ bikhre

ye kāhkashāñ tere qadam chuum rahī hai

har sher kī tū shaan hai shaukat hai hasham hai

mauzūa pe tere hī ravāñ merā qalam hai

tābānī-e-peshānī se raushan haiñ sitāre

sahbā se haiñ labrez tirī āñkhoñ ke pyāle

palkoñ kī banāvaT meñ nihāñ kāsa-e-lab hai

miinā se mushābah hai surāhī-numā gardan

chehre kī tajallī se numūd-e-saharī hai

ye shaam hai to tere hī gesū ke sabab se

dariyā meñ talātum hai to bas tere hī lab se

qudrat ne sajā rakhe haiñ motī jo dahan meñ

hai hiire zamurrad kī misāl in se hī raushan

hoñToñ se tabassum kī lahar chhūT rahī hai

aariz ke gulāboñ se shafaq phuuT rahī hai

dariyā-e-mohabbat ke kināre kī qasam sun

añgusht-e-hinā.ī ke ishāre kī qasam sun

tū hai to mirī zindagī ābād bahut hai

jo tū nahīñ to zindagī barbād bahut hai

hai tamkanat-e-fasl-e-bahār ek tujhī se

har chehra-e-gul par hai nikhār ek tujhī se

ab haar ho yā jiit mujhe is se ġharaz kyā

ik tere liye maiñ ye juā khel rahā huuñ

aa dekh salāḳhoñ se mire karb kā aalam

ik umr se furqat kī sazā jhel rahā huuñ

ai jān-e-bahār aan ke gulshan ko sajā de

is ujḌe bayābāñ ko chaman-zār banā de

ai faḳhr-e-vafā nāz-e-asad shān-e-tahammul

ye nazm nahīñ jhiil meñ kāġhaz kī kañval hai

ḳhurram to nahīñ maiñ ki tujhe tāj-mahal duuñ

ai jān-e-ġhazal tere liye shām-e-ġhazal hai

ai malika-e-afkār daraḳhshān-e-taḳhayyul

ai chāñdnī-e-zulmat-e-shab jān-e-taġhazzul

kis naam kin alfāz se maiñ tujh ko navāzūñ

kis tarah tujhe nazm ke sāñche meñ maiñ Dhālūñ

qudrat kī baḌī den hai tū shai hī ajab hai

shā.ir kī tamannā hai taqāzā hai talab hai

ai malika-e-afkar daraKHshan-e-taKHayyul

ai chandni-e-zulmat-e-shab jaan-e-taghazzul

kis nam kis alfaz se main tujh ko nawazun

kis tarah tujhe nazm ke sanche mein Dhaalun

maKHmal sa badan nuqta-o-KHat phul hai jis ka

ye tarz-e-nigarish ki nazar jhum rahi hai

ye chand sitare hain teri rah mein bikhre

ye kahkashan tere qadam chum rahi hai

har sher ki tu shan hai shaukat hai hasham hai

mauzua pe tere hi rawan mera qalam hai

tabani-e-peshani se raushan hain sitare

sahba se hain labrez teri aankhon ke pyale

palkon ki banawaT mein nihan kasa-e-lab hai

mina se mushabah hai surahi-numa gardan

chehre ki tajalli se numud-e-sahari hai

ye sham hai to tere hi gesu ke sabab se

dariya mein talatum hai to bas tere hi lab se

qudrat ne saja rakhe hain moti jo dahan mein

hai hire zamurrad ki misal in se hi raushan

honTon se tabassum ki lahar chhuT rahi hai

aariz ke gulabon se shafaq phuT rahi hai

dariya-e-mohabbat ke kinare ki qasam sun

angusht-e-hinai ke ishaare ki qasam sun

tu hai to meri zindagi aabaad bahut hai

jo tu nahin to zindagi barbaad bahut hai

hai tamkanat-e-fasl-e-bahaar ek tujhi se

har chehra-e-gul par hai nikhaar ek tujhi se

ab haar ho ya jit mujhe is se gharaz kya

ek tere liye main ye jua khel raha hun

aa dekh salaKHon se mere karb ka aalam

ek umr se furqat ki saza jhel raha hun

ai jaan-e-bahaar aan ke gulshan ko saja de

is ujDe bayaban ko chaman-zar bana de

ai faKHr-e-wafa naz-e-asad shan-e-tahammul

ye nazm nahin jhil mein kaghaz ki kanwal hai

KHurram to nahin main ki tujhe taj-mahal dun

ai jaan-e-ghazal tere liye sham-e-ghazal hai

ai malika-e-afkar daraKHshan-e-taKHayyul

ai chandni-e-zulmat-e-shab jaan-e-taghazzul

kis nam kin alfaz se main tujh ko nawazun

kis tarah tujhe nazm ke sanche mein main Dhaalun

qudrat ki baDi den hai tu shai hi ajab hai

shair ki tamanna hai taqaza hai talab hai