shair

saarī duniyā sau rahī hai aur tū bedār hai

duur hai rāhat se aur lazzat-kash-e-āzār hai

le rahā hai zarre zarre se tū ibrat kā sabaq

ya.anī har har gaam par hotā hai siina terā shaq

terī nazreñ dekhtī haiñ intihā āġhāz meñ

mahv ho jaatā hai jab tū inkishāf-e-rāz meñ

zāhirī rañj-o-alam se dil tirā begāna hai

inkishāf-e-rāz-e-yazdānī kā to dīvāna hai

muztarib hotī hai terī ruuh lahreñ dekh kar

tū samajhtā hai unhīñ se kyā hai anjām-e-bashar

dekh kar phūloñ ko rotā hai kabhī tū zaar zaar

vajd meñ kartā hai apnā hī garebāñ taar taar

qatra-e-shabnam haiñ goyā ik kitāb-e-zindagī

dekhtā hai jis ko to paḌh paḌh ke ḳhvāb-e-zindagī

to hai akkās-e-azal fitrat meñ terī dard hai

go ba-zāhir ḳhush hai lekin lab pe āh-e-sard hai

tū ne fitrat ke sabaq ko phir se dohrāyā yahāñ

āshkārā kar diye jo raaz the ab tak nihāñ

fitrat-e-ḳhvābīda ko bedār kar detā hai tū

zindagī se aish kī bezār kar detā hai tū

mast ho jaatā hai tū abr-e-siyah ko dekh kar

chashmakoñ se barq kī letā hai tū kyā kyā asar

ai ki terī zaat se hai raunaq-e-bazm-e-jahāñ

ai ki hastī hai tirī sarmāya-dār-e-kun-fakāñ

ai ki tirī zaat se hai raunaq-e-bazm-e-shuhūd

ai ki tere rañg se har shai meñ hai rañg-e-numūd

tū na hotā to na hotā ye jahān-e-rañg-o-bū

tū na hotā to na hotī husn kī kuchh aabrū

tū na hotā to na hote munkashif rāz-e-hayāt

tū na hotā to na hotā naqsh-e-fānī ko sabāt

sari duniya sau rahi hai aur tu bedar hai

dur hai rahat se aur lazzat-kash-e-azar hai

le raha hai zarre zarre se tu ibrat ka sabaq

yani har har gam par hota hai sina tera shaq

teri nazren dekhti hain intiha aaghaz mein

mahw ho jata hai jab tu inkishaf-e-raaz mein

zahiri ranj-o-alam se dil tera begana hai

inkishaf-e-raaz-e-yazdani ka to diwana hai

muztarib hoti hai teri ruh lahren dekh kar

tu samajhta hai unhin se kya hai anjam-e-bashar

dekh kar phulon ko rota hai kabhi tu zar zar

wajd mein karta hai apna hi gareban tar tar

qatra-e-shabnam hain goya ek kitab-e-zindagi

dekhta hai jis ko to paDh paDh ke KHwab-e-zindagi

to hai akkas-e-azal fitrat mein teri dard hai

go ba-zahir KHush hai lekin lab pe aah-e-sard hai

tu ne fitrat ke sabaq ko phir se dohraya yahan

aashkara kar diye jo raaz the ab tak nihan

fitrat-e-KHwabida ko bedar kar deta hai tu

zindagi se aish ki bezar kar deta hai tu

mast ho jata hai tu abr-e-siyah ko dekh kar

chashmakon se barq ki leta hai tu kya kya asar

ai ki teri zat se hai raunaq-e-bazm-e-jahan

ai ki hasti hai teri sarmaya-dar-e-kun-fakan

ai ki teri zat se hai raunaq-e-bazm-e-shuhud

ai ki tere rang se har shai mein hai rang-e-numud

tu na hota to na hota ye jahan-e-rang-o-bu

tu na hota to na hoti husn ki kuchh aabru

tu na hota to na hote munkashif raaz-e-hayat

tu na hota to na hota naqsh-e-fani ko sabaat