shairi

insānoñ ke dil meñ bachchoñ

ik pyaar kā dariyā bahtā hai

jo aañkh se ojhal rahtā hai

lekin duniyā meñ kabhī-kabhī

lagtā hai kuchh itnā achchhā

vo chāñd kī jhilmil kirneñ hoñ

yā rim-jhim paanī bārish kā

yā aisā ho insān koī

jo itnā pyārā hameñ lage

ham bol nahīñ kuchh paate haiñ

chup-chāp khaḌe rah jaate haiñ

tab ek anokhe jaadū se

bārish hotī hai lafzoñ kī

jo giit rasīlā gaate haiñ

aur ham shā.ir ban jaate haiñ

jab dil par choT lage gahrī

aur aañsū piinā mushkil ho

āsān lage bas mar jaanā

dukh sah kar jiinā mushkil ho

tab ek anokhe jaadū se

hotī hai bārish lafzoñ kī

jo giit rasīlā gaate haiñ

aur ham shā.ir ban jaate haiñ

thā koī zamāna jab shā.ir

jādūgar samjhe jaate the

kyā sach-much haiñ vo jādūgar

ye bhed kisī ne kab paayā

ik baat magar sab ne maanī

jab dil se nikle sher koī

kar detā hai ham par jaadū

vo sab ko achchhā lagtā hai

aur bilkul sachchā lagtā hai

insanon ke dil mein bachchon

ek pyar ka dariya bahta hai

jo aankh se ojhal rahta hai

lekin duniya mein kabhi-kabhi

lagta hai kuchh itna achchha

wo chand ki jhilmil kirnen hon

ya rim-jhim pani barish ka

ya aisa ho insan koi

jo itna pyara hamein lage

hum bol nahin kuchh pate hain

chup-chap khaDe rah jate hain

tab ek anokhe jadu se

barish hoti hai lafzon ki

jo git rasila gate hain

aur hum shair ban jate hain

jab dil par choT lage gahri

aur aansu pina mushkil ho

aasan lage bas mar jaana

dukh sah kar jina mushkil ho

tab ek anokhe jadu se

hoti hai barish lafzon ki

jo git rasila gate hain

aur hum shair ban jate hain

tha koi zamana jab shair

jadugar samjhe jate the

kya sach-much hain wo jadugar

ye bhed kisi ne kab paya

ek baat magar sab ne mani

jab dil se nikle sher koi

kar deta hai hum par jadu

wo sab ko achchha lagta hai

aur bilkul sachcha lagta hai