sham

dhīre dhīre shaam aa rahī hai

raat kī kitāboñ meñ

pat-jhaḌoñ kī sāñsoñ meñ

dhundlī dhundlī āñkhoñ meñ raat baḌhtī jā rahī hai

niiñd ek gaañv hai

niiñd kī talāsh meñ

āvāzeñ aa rahī haiñ

paañv khaḌā.ūñ pahne sat sat gā rahe haiñ

pīpal ke paat hare dhīre dhīre gir rahe haiñ

ka.ī haath baḌh rahe haiñ

shak vaale rang liye moroñ ke pañkhoñ se sabhyatā ko likh rahe haiñ

pīpal ke paat hare dhīre dhīre gir rahe haiñ

maaTī ke Dible meñ pho.e pho.e jal rahe haiñ

pīpal ke paat hare dhīre dhīre gir rahe haiñ

dhīre dhīre gir rahe haiñ

dhīre dhīre shaam aa rahī hai

miTTī barasne ke shañkh chīḳhne lage haiñ

mard sab kapās se bañdhe hue

saral sapāT uñgliyoñ se

apne apne ghar ke sā.ebān meñ

apne apne devtāoñ kī shabīheñ likh rahe haiñ

āsanoñ ke ramz meñ guñdhī huī tamām aurteñ bhī aa ga.ī haiñ

aurteñ hatheliyoñ se chāñd bun rahī haiñ

duudh kī kaToriyoñ se sūrajoñ kī ātmā.eñ math rahī haiñ

dhīre dhīre jal rahī haiñ

dhīre dhīre bujh rahī haiñ

dhīre dhīre shaam aa rahī hai

dhire dhire sham aa rahi hai

raat ki kitabon mein

pat-jhaDon ki sanson mein

dhundli dhundli aankhon mein raat baDhti ja rahi hai

nind ek ganw hai

nind ki talash mein

aawazen aa rahi hain

panw khaDaun pahne sat sat ga rahe hain

pipal ke pat hare dhire dhire gir rahe hain

kai hath baDh rahe hain

shak wale rang liye moron ke pankhon se sabhyata ko likh rahe hain

pipal ke pat hare dhire dhire gir rahe hain

maTi ke Dible mein phoe phoe jal rahe hain

pipal ke pat hare dhire dhire gir rahe hain

dhire dhire gir rahe hain

dhire dhire sham aa rahi hai

miTTi barasne ke shankh chiKHne lage hain

mard sab kapas se bandhe hue

saral sapaT ungliyon se

apne apne ghar ke saeban mein

apne apne dewtaon ki shabihen likh rahe hain

aasanon ke ramz mein gundhi hui tamam aurten bhi aa gai hain

aurten hatheliyon se chand bun rahi hain

dudh ki kaToriyon se surajon ki aatmaen math rahi hain

dhire dhire jal rahi hain

dhire dhire bujh rahi hain

dhire dhire sham aa rahi hai