sham-e-ayaadat

ye kaun muskurāhaToñ kā kārvāñ liye hue

shabāb-e-sher-o-rañg-o-nūr kā dhuāñ liye hue

dhuāñ ki barq-e-husn kā mahaktā sho.ala hai koī

chaTīlī zindagī kī shādmāniyāñ liye hue

laboñ se pañkhuḌī gulāb kī hayāt māñge hai

kañval sī aañkh sau nigāh-e-mehrbāñ liye hue

qadam qadam pe de uThī hai lau zamīn-e-rah-guzar

adā adā meñ be-shumār bijliyāñ liye hue

nikalte baiThte dinoñ kī āhaTeñ nigāh meñ

rasīle hoñT fasl-e-gul kī dāstāñ liye hue

ḳhutūt-e-ruḳh meñ jalva-gar vafā ke naqsh sar-ba-sar

dil-e-ġhanī meñ kul hisāb-e-dostāñ liye hue

vo muskurātī āñkheñ jin meñ raqs kartī hai bahār

shafaq kī gul kī bijliyoñ kī shoḳhiyāñ liye hue

adā-e-husn barq-pāsh shola-zan nazāra-soz

fazā-e-husn uudī uudī bijliyāñ liye hue

jagāne vaale naġhma-e-sahar laboñ pe maujzan

nigāheñ niiñd laane vaalī loriyāñ liye hue

vo nargis-e-siyāh-e-nīm-bāz, mai-kada-ba-dosh

hazār mast rātoñ kī javāniyāñ liye hue

taġhāful-o-ḳhumār aur be-ḳhudī kī oT meñ

nigāheñ ik jahāñ kī hoshiyāriyāñ liye hue

harī-bharī ragoñ meñ vo chahaktā boltā lahū

vo sochtā huā badan ḳhud ik jahāñ liye hue

za-farq tā-qadam tamām chehra jism-e-nāznīñ

latīf jagmagāhaToñ kā kārvāñ liye hue

tabassumash takallume takallumash tarannume

nafas nafas meñ thartharātā sāz-e-jāñ liye hue

jabīn-e-nūr jis pe paḌ rahī hai narm chhūT sī

ḳhud apnī jagmagāhToñ kī kahkashāñ liye hue

''sitāra-bār o mah-chakāñ o ḳhūr-fishāñ'' jamāl-e-yār

jahān-e-nūr kārvāñ-ba-kārvāñ liye hue

vo zulf-e-ḳham-ba-ḳham shamīm-e-mast se dhuāñ dhuāñ

vo ruḳh chaman chaman bahār-e-jāvedāñ liye hue

ba-mastī-e-jamāl-e-kā.enāt, ḳhvāb-e-kā.enāt

ba-gardish-e-nigāh daur-e-āsmāñ liye hue

ye kaun aa gayā mire qarīb uzv uzv meñ

javāniyāñ, javāniyoñ kī āñdhiyāñ liye hue

ye kaun aañkh paḌ rahī hai mujh par itne pyaar se

vo bhūlī sī vo yaad sī kahāniyāñ liye hue

ye kis kī mahkī mahkī sāñseñ taaza kar ga.iiñ dimāġh

shaboñ ke raaz nūr-e-mah kī narmiyāñ liye hue

ye kin nigāhoñ ne mire gale meñ bāheñ Daal diiñ

jahān bhar ke dukh se dard se amaañ liye hue

nigāh-e-yār de ga.ī mujhe sukūn-e-be-karāñ

vo be-kahī vafāoñ kī gavāhiyāñ liye hue

mujhe jagā rahā hai maut kī ġhunūdgī se kaun

nigāhoñ meñ suhāg-rāt kā samāñ liye hue

mirī fasurda aur bujhī huī jabīñ ko chhū liyā

ye kis nigāh kī kiran ne sāz-e-jāñ liye hue

sute se chehre par hayāt rasmasātī muskurātī

na jaane kab ke āñsuoñ kī dāstāñ liye hue

tabassum-e-sahar hai aspatāl kī udaas shaam

ye kaun aa gayā nashāt-e-be-karāñ liye hue

tire na aane tak agarche mehrbāñ thā ik jahāñ

maiñ ro ke rah gayā huuñ sau ġham-e-nihāñ liye hue

zamīn muskurā uThī ye shaam jagmagā uThī

bahār lahlhā uThī shamīm-e-jāñ liye hue

fazā-e-aspatāl hai ki rañg-o-bū kī karvaTeñ

tire jamāl-e-lāla-gūñ kī dāstāñ liye hue

'firāq' aaj pichhlī raat kyuuñ na mar rahūñ ki ab

hayāt aisī shāmeñ hogī phir kahāñ liye hue

(2)

magar nahīñ kuchh aur maslahat thī us ke aane meñ

jamāl-o-dīd-e-yār the nayā jahāñ liye hue

isī na.e jahāñ meñ aadmī baneñge aadmī

jabīñ pe shāhkār-e-dahr kā nishāñ liye hue

isī na.e jahāñ meñ aadmī baneñge devtā

tahāratoñ kā farq-e-pāk par nishāñ liye hue

ḳhudā.ī aadmī kī hogī is na.e jahān par

sitāroñ ke haiñ dil ye pesh-goīyañ liye hue

sulagte dil sharar-fishāñ o sho.ala-bār barq-pāsh

guzarte din hayāt-e-nau kī surḳhiyāñ liye hue

tamām qaul aur qasam nigāh-e-nāz-e-yār thī

tulū-e-zindagī-e-nau kī dāstāñ liye hue

nayā janam huā mirā ki zindagī na.ī milī

jiyūñgā shām-e-dīd kī nishāniyāñ liye hue

na dekhā aañkh uThā ke ahd-e-nau ke parda-dāroñ ne

guzar gayā zamāna yād-e-raftagāñ liye hue

ham inqilābiyoñ ne ye jahāñ bachā liyā magar

abhī hai ik jahāñ vo bad-gumāniyāñ liye hue

(3)

na.e zamāne meñ agar udaas ḳhud ko pā.ūñgā

ye shaam yaad kar ke apne ġham ko bhuul jā.ūñgā

ayādat-e-habīb se vo aaj zindagī milī

ḳhushī bhī chauñk chauk uThī ġham kī aañkh khul ga.ī

agarche doctor ne mujh ko maut se bachā liyā

par is ke ba.ad us nigāh ne mujhe jilā liyā

nigāh-e-yār tujh se apnī manzileñ maiñ pā.ūñgā

tujhe jo bhuul jā.ūñgā to raah bhuul jā.ūñgā

(4)

qarīb-tar maiñ ho chalā huuñ dukh kī kā.enāt se

maiñ ajnabī nahīñ rahā hayāt se mamāt se

vo dukh sahe ki mujh pe khul gayā hai dard-e-kā.enāt

hai apne āñsuoñ se mujh pe ā.īna ġham-e-hayāt

ye be-qusūr jān-dār dard jhelte hue

ye ḳhāk-o-ḳhūñ ke putle apnī jaañ pe khelte hue

vo ziist kī karāh jis se be-qarār hai fazā

vo zindagī kī aah jis se kaañp uThtī hai fazā

kafan hai āñsuoñ kā dukh kī maarī kā.enāt par

hayāt kyā inheñ haqīqatoñ se honā be-ḳhabar

jo aañkh jāgtī rahī hai aadmī kī maut par

vo abr-e-rañg-rañg ko bhī dekhtī hai sāda-tar

sikhā gayā dukh mirā purānī piir jānñā

nigāh-e-yār thī jahāñ bhī aaj merī rahnumā

yahī nahīñ ki mujh ko aaj zindagī na.ī milī

haqīqat-e-hayāt mujh pe sau tarah se khul ga.ī

gavāh hai ye shaam aur nigāh-e-yār hai gavāh

ḳhayāl-e-maut ko maiñ apne dil meñ ab na dūñgā raah

jiyūñgā haañ jiyūñgā ai nigāh-e-āshnā-e-yār

sadā suhāg zindagī hai aur jahāñ sadā-bahār

(5)

abhī to kitne nā-shunīda naġhma-e-hayāt haiñ

abhī nihāñ diloñ se kitne rāz-e-kā.enāt haiñ

abhī to zindagī ke nā-chashīda ras haiñ saikḌoñ

abhī to haath meñ ham ahl-e-ġham ke jas haiñ saikḌoñ

abhī vo le rahī haiñ merī shā.erī meñ karvaTeñ

abhī chamakne vaalī hai chhupī huī haqīqateñ

abhī to bahr-o-bar pe so rahī haiñ merī vo sadā.eñ

sameT luuñ unheñ to phir vo kā.enāt ko jagā.eñ

abhī to ruuh ban ke zarre zarre meñ samā.ūñgā

abhī to sub.h ban ke maiñ ufuq pe thartharā.ūñgā

abhī to merī shā.erī haqīqateñ lūTā.egī

abhī mirī sadā-e-dard ik jahāñ pe chhā.egī

abhī to aadmī asīr-e-dām hai ġhulām hai

abhī to zindagī sad-inqalāb kā payām hai

abhī tamām zaḳhm o daaġh hai tamaddun-e-jahāñ

abhī ruḳh-e-bashar pe haiñ bahmiyat kī jhā.iyāñ

abhī mashiyyatoñ pe fat.h pā nahīñ sakā bashar

abhī muqaddaroñ ko bas meñ lā nahīñ sakā bashar

abhī to is dukhī jahāñ meñ maut hī kā daur hai

abhī to jis ko zindagī kaheñ vo chiiz aur hai

abhī to ḳhuun thoktī hai zindagī bahār meñ

abhī to rone kī sadā hai naġhma-e-sitār meñ

abhī to uḌtī haiñ ruḳh-e-bahār par havā.iyāñ

abhī to dīdanī haiñ har chaman kī be-fazā.iyāñ

abhī fazā-e-dahr legī karvaToñ pe karvaTeñ

abhī to sotī haiñ havāoñ kī vo sansanāhaTeñ

ki jis ko sunte hī hukūmatoñ ke rañg-e-ruḳh uḌeñ

chapeTeñ jin kī sarkashoñ kī gardaneñ maroḌ deñ

abhī to sīna-e-bashar meñ sote haiñ vo zalzale

ki jin ke jāgte hī maut kā bhī dil dahal uThe

abhī to batn-e-ġhaib meñ hai is savāl kā javāb

ḳhudā-e-ḳhair-o-shar bhī lā nahīñ sakā thā jis kī taab

abhī to god meñ haiñ devtāoñ kī vo māh-o-sāl

jo deñge baḌh ke barq-e-tūr se hayāt ko jalāl

abhī rag-e-jahāñ meñ zindagī machalne vaalī hai

abhī hayāt kī na.ī sharāb Dhalne vaalī hai

abhī chhurī sitam kī Duub kar uchhalne vaalī hai

abhī to hasrat ik jahān kī nikalne vaalī hai

abhī ghan-garaj sunā.ī degī inqalāb kī

abhī to gosh-bar-sadā hai bazm āftāb kī

abhī to pūñjī-vād ko jahān se miTānā hai

abhī to sāmrājoñ ko sazā-e-maut paanā hai

abhī to daañt pīstī hai maut shahryāroñ kī

abhī to ḳhuuñ utar rahā hai ā.ankhoñ meñ sitāroñ kī

abhī to ishtirākiyat ke jhanDe gaḌne vaale haiñ

abhī to jaḌ se kisht-o-ḳhūñ ke nazm ukhaḌne vaale haiñ

abhī kisān-o-kāmgār raaj hone vaalā hai

abhī bahut jahāñ meñ kām-kāj hone vaalā hai

magar abhī to zindagī musībatoñ kā naam hai

abhī to niiñd maut kī mire liye harām hai

ye sab payām ik nigāh meñ vo aañkh de ga.ī

ba-yak-nazar kahāñ kahāñ mujhe vo aañkh le ga.ī

ye kaun muskurahaTon ka karwan liye hue

shabab-e-sher-o-rang-o-nur ka dhuan liye hue

dhuan ki barq-e-husn ka mahakta shoala hai koi

chaTili zindagi ki shadmaniyan liye hue

labon se pankhuDi gulab ki hayat mange hai

kanwal si aankh sau nigah-e-mehrban liye hue

qadam qadam pe de uThi hai lau zamin-e-rah-guzar

ada ada mein be-shumar bijliyan liye hue

nikalte baiThte dinon ki aahaTen nigah mein

rasile honT fasl-e-gul ki dastan liye hue

KHutut-e-ruKH mein jalwa-gar wafa ke naqsh sar-ba-sar

dil-e-ghani mein kul hisab-e-dostan liye hue

wo muskuraati aankhen jin mein raqs karti hai bahaar

shafaq ki gul ki bijliyon ki shoKHiyan liye hue

ada-e-husn barq-pash shola-zan nazara-soz

faza-e-husn udi udi bijliyan liye hue

jagane wale naghma-e-sahar labon pe maujzan

nigahen nind lane wali loriyan liye hue

wo nargis-e-siyah-e-nim-baz, mai-kada-ba-dosh

hazar mast raaton ki jawaniyan liye hue

taghaful-o-KHumar aur be-KHudi ki oT mein

nigahen ek jahan ki hoshiyariyan liye hue

hari-bhari ragon mein wo chahakta bolta lahu

wo sochta hua badan KHud ek jahan liye hue

za-farq ta-qadam tamam chehra jism-e-naznin

latif jagmagahaTon ka karwan liye hue

tabassumash takallume takallumash tarannume

nafas nafas mein thartharaata saz-e-jaan liye hue

jabin-e-nur jis pe paD rahi hai narm chhuT si

KHud apni jagmagahTon ki kahkashan liye hue

sitara-bar o mah-chakan o KHur-fishan jamal-e-yar

jahan-e-nur karwan-ba-karwan liye hue

wo zulf-e-KHam-ba-KHam shamim-e-mast se dhuan dhuan

wo ruKH chaman chaman bahaar-e-jawedan liye hue

ba-masti-e-jamal-e-kaenat, KHwab-e-kaenat

ba-gardish-e-nigah daur-e-asman liye hue

ye kaun aa gaya mere qarib uzw uzw mein

jawaniyan, jawaniyon ki aandhiyan liye hue

ye kaun aankh paD rahi hai mujh par itne pyar se

wo bhuli si wo yaad si kahaniyan liye hue

ye kis ki mahki mahki sansen taza kar gain dimagh

shabon ke raaz nur-e-mah ki narmiyan liye hue

ye kin nigahon ne mere gale mein bahen Dal din

jahan bhar ke dukh se dard se aman liye hue

nigah-e-yar de gai mujhe sukun-e-be-karan

wo be-kahi wafaon ki gawahiyan liye hue

mujhe jaga raha hai maut ki ghunudgi se kaun

nigahon mein suhag-raat ka saman liye hue

meri fasurda aur bujhi hui jabin ko chhu liya

ye kis nigah ki kiran ne saz-e-jaan liye hue

sute se chehre par hayat rasmasati muskuraati

na jaane kab ke aansuon ki dastan liye hue

tabassum-e-sahar hai aspatal ki udas sham

ye kaun aa gaya nashat-e-be-karan liye hue

tere na aane tak agarche mehrban tha ek jahan

main ro ke rah gaya hun sau gham-e-nihan liye hue

zamin muskura uThi ye sham jagmaga uThi

bahaar lahlha uThi shamim-e-jaan liye hue

faza-e-aspatal hai ki rang-o-bu ki karwaTen

tere jamal-e-lala-gun ki dastan liye hue

'firaq' aaj pichhli raat kyun na mar rahun ki ab

hayat aisi shamen hogi phir kahan liye hue

(2)

magar nahin kuchh aur maslahat thi us ke aane mein

jamal-o-did-e-yar the naya jahan liye hue

isi nae jahan mein aadmi banenge aadmi

jabin pe shahkar-e-dahr ka nishan liye hue

isi nae jahan mein aadmi banenge dewta

tahaaraton ka farq-e-pak par nishan liye hue

KHudai aadmi ki hogi is nae jahan par

sitaron ke hain dil ye pesh-goiyan liye hue

sulagte dil sharar-fishan o shoala-bar barq-pash

guzarte din hayat-e-nau ki surKHiyan liye hue

tamam qaul aur qasam nigah-e-naz-e-yar thi

tulu-e-zindagi-e-nau ki dastan liye hue

naya janam hua mera ki zindagi nai mili

jiyunga sham-e-did ki nishaniyan liye hue

na dekha aankh uTha ke ahd-e-nau ke parda-daron ne

guzar gaya zamana yaad-e-raftagan liye hue

hum inqilabiyon ne ye jahan bacha liya magar

abhi hai ek jahan wo bad-gumaniyan liye hue

(3)

nae zamane mein agar udas KHud ko paunga

ye sham yaad kar ke apne gham ko bhul jaunga

ayaadat-e-habib se wo aaj zindagi mili

KHushi bhi chaunk chauk uThi gham ki aankh khul gai

agarche doctor ne mujh ko maut se bacha liya

par is ke baad us nigah ne mujhe jila liya

nigah-e-yar tujh se apni manzilen main paunga

tujhe jo bhul jaunga to rah bhul jaunga

(4)

qarib-tar main ho chala hun dukh ki kaenat se

main ajnabi nahin raha hayat se mamat se

wo dukh sahe ki mujh pe khul gaya hai dard-e-kaenat

hai apne aansuon se mujh pe aaina gham-e-hayat

ye be-qusur jaan-dar dard jhelte hue

ye KHak-o-KHun ke putle apni jaan pe khelte hue

wo zist ki karah jis se be-qarar hai faza

wo zindagi ki aah jis se kanp uThti hai faza

kafan hai aansuon ka dukh ki mari kaenat par

hayat kya inhen haqiqaton se hona be-KHabar

jo aankh jagti rahi hai aadmi ki maut par

wo abr-e-rang-rang ko bhi dekhti hai sada-tar

sikha gaya dukh mera purani pir jaanna

nigah-e-yar thi jahan bhi aaj meri rahnuma

yahi nahin ki mujh ko aaj zindagi nai mili

haqiqat-e-hayat mujh pe sau tarah se khul gai

gawah hai ye sham aur nigah-e-yar hai gawah

KHayal-e-maut ko main apne dil mein ab na dunga rah

jiyunga han jiyunga ai nigah-e-ashna-e-yar

sada suhag zindagi hai aur jahan sada-bahaar

(5)

abhi to kitne na-shunida naghma-e-hayat hain

abhi nihan dilon se kitne raaz-e-kaenat hain

abhi to zindagi ke na-chashida ras hain saikDon

abhi to hath mein hum ahl-e-gham ke jas hain saikDon

abhi wo le rahi hain meri shaeri mein karwaTen

abhi chamakne wali hai chhupi hui haqiqaten

abhi to bahr-o-bar pe so rahi hain meri wo sadaen

sameT lun unhen to phir wo kaenat ko jagaen

abhi to ruh ban ke zarre zarre mein samaunga

abhi to subh ban ke main ufuq pe thartharaunga

abhi to meri shaeri haqiqaten luTaegi

abhi meri sada-e-dard ek jahan pe chhaegi

abhi to aadmi asir-e-dam hai ghulam hai

abhi to zindagi sad-inqalab ka payam hai

abhi tamam zaKHm o dagh hai tamaddun-e-jahan

abhi ruKH-e-bashar pe hain bahmiyat ki jhaiyan

abhi mashiyyaton pe fath pa nahin saka bashar

abhi muqaddaron ko bas mein la nahin saka bashar

abhi to is dukhi jahan mein maut hi ka daur hai

abhi to jis ko zindagi kahen wo chiz aur hai

abhi to KHun thokti hai zindagi bahaar mein

abhi to rone ki sada hai naghma-e-sitar mein

abhi to uDti hain ruKH-e-bahaar par hawaiyan

abhi to didani hain har chaman ki be-fazaiyan

abhi faza-e-dahr legi karwaTon pe karwaTen

abhi to soti hain hawaon ki wo sansanahaTen

ki jis ko sunte hi hukumaton ke rang-e-ruKH uDen

chapeTen jin ki sarkashon ki gardanen maroD den

abhi to sina-e-bashar mein sote hain wo zalzale

ki jin ke jagte hi maut ka bhi dil dahal uThe

abhi to batn-e-ghaib mein hai is sawal ka jawab

KHuda-e-KHair-o-shar bhi la nahin saka tha jis ki tab

abhi to god mein hain dewtaon ki wo mah-o-sal

jo denge baDh ke barq-e-tur se hayat ko jalal

abhi rag-e-jahan mein zindagi machalne wali hai

abhi hayat ki nai sharab Dhalne wali hai

abhi chhuri sitam ki Dub kar uchhalne wali hai

abhi to hasrat ek jahan ki nikalne wali hai

abhi ghan-garaj sunai degi inqalab ki

abhi to gosh-bar-sada hai bazm aaftab ki

abhi to punji-wad ko jahan se miTana hai

abhi to samrajon ko saza-e-maut pana hai

abhi to dant pisti hai maut shahryaron ki

abhi to KHun utar raha hai aaankhon mein sitaron ki

abhi to ishtirakiyat ke jhanDe gaDne wale hain

abhi to jaD se kisht-o-KHun ke nazm ukhaDne wale hain

abhi kisan-o-kaamgar raj hone wala hai

abhi bahut jahan mein kaam-kaj hone wala hai

magar abhi to zindagi musibaton ka nam hai

abhi to nind maut ki mere liye haram hai

ye sab payam ek nigah mein wo aankh de gai

ba-yak-nazar kahan kahan mujhe wo aankh le gai