sham ka manzar

shaam huī hai sūraj Duubā

rañg zamāne kā hai badlā

shaam suhānī dekho aa.ī

kaisā suhānā vaqt hai laa.ī

dil ko lubhā letā hai kaisā

chain hameñ detā hai kaisā

shaam kā achchhā achchhā manzar

dil ko lubhāne vaalā manzar

ghar ko chalā hai khetī vaalā

mehnat se sab tan hai kaalā

bail bhī chhoḌā hal bhī chhoḌā

ghar kī jānib muñh ko moḌā

hāñkā vo bailoñ ko apne

chalā vo ghar ko dhīme dhīme

khet se apne ghar ko sidhārā

legā ab ārām bechārā

bailoñ ko khūñToñ se bāñdhā

sāmne un ke bhūsa Daalā

baiThā ḳhud bachchoñ meñ jā kar

kaisā ḳhush hai us kā ghar bhar

idhar udhar se chiḌiyāñ uḌ kar

aa baiThīñ shāḳhoñ ke uupar

ab ye shab bhar leñgī baserā

sub.h ko phir khetoñ kā pherā

jhiil kināre aa kar baiThī

dam lene ko har murġhābī

tum bhī bachcho khelnā chhoḌo

apne apne ghar ko chal do

saarā din rāhat se guzrā

'jauhar' shukr karo ḳhāliq kā

sham hui hai suraj Duba

rang zamane ka hai badla

sham suhani dekho aai

kaisa suhana waqt hai lai

dil ko lubha leta hai kaisa

chain hamein deta hai kaisa

sham ka achchha achchha manzar

dil ko lubhane wala manzar

ghar ko chala hai kheti wala

mehnat se sab tan hai kala

bail bhi chhoDa hal bhi chhoDa

ghar ki jaanib munh ko moDa

hanka wo bailon ko apne

chala wo ghar ko dhime dhime

khet se apne ghar ko sidhaara

lega ab aaram bechaara

bailon ko khunTon se bandha

samne un ke bhusa Dala

baiTha KHud bachchon mein ja kar

kaisa KHush hai us ka ghar bhar

idhar udhar se chiDiyan uD kar

aa baiThin shaKHon ke upar

ab ye shab bhar lengi basera

subh ko phir kheton ka phera

jhil kinare aa kar baiThi

dam lene ko har murghabi

tum bhi bachcho khelna chhoDo

apne apne ghar ko chal do

sara din rahat se guzra

'jauhar' shukr karo KHaliq ka