sham ko raste par

raat ke aks-e-taḳhayyul se mulāqāt ho jis kā maqsūd

kabhī darvāze se aatā hai kabhī khiḌkī se

aur har baar na.e bhes meñ dar aatā hai

us ko ik shaḳhs samajhnā to munāsib hī nahīñ

vo tasavvur meñ mire aks hai har shaḳhs kā har insāñ kā

kabhī bhar letā hai ik bholī sī mahbūba-e-nādān kā bahrūp kabhī

ek chālāk jahāñ-dīda o be-bāk sitam-gar ban kar

dhokā dene ke liye aatā hai bahkātā hai

aur jab vaqt guzar jaa.e to chhup jaatā hai

mirī āñkhoñ meñ magar chhāyā hai bādal ban kar

ek dīvār kā rauzan isī rauzan se nikal kar kirneñ

mirī āñkhoñ se lipaTtī haiñ machal uThtī haiñ

ārzueñ dil-e-ġham-dīda ke āsūda nihāñ-ḳhāne se

aur maiñ sochtā huuñ nuur ke is parde meñ

kaun be-bāk hai aur bholī sī mahbūba kaun

soch ko rok hai dīvār kī vo kaise chale

kaise jā pahuñche kisī ḳhalvat-e-mahjūb ke maḳhmūr sanam-ḳhāne meñ

vo sanam-ḳhāna jahāñ baiThe haiñ do but ḳhāmosh

aur nigāhoñ se har ik baat kahe jaate haiñ

zehn ko un ke dhundalke ne banāyā hai ik aisā akkās

jo faqat apne hī man-māne manāzir ko giraftār kare

maiñ khaḌā dekhtā huuñ sochtā huuñ jab donoñ

chhoḌ kar dil ke sanam-ḳhāne ko ghar jā.eñge

sehn meñ talḳh haqīqat ko khaḌā pā.eñge

ek sochegā mirī jeb ye duniyā ye samāj

ek dekhegā vahāñ aur hī tayyārī hai

mujh ko uljhan hai ye kyuuñ maiñ to nahīñ huuñ maujūd

raat kī ḳhalvat-e-mahjūb ke maḳhmūr sanam-ḳhāne meñ

mirī āñkhoñ ko nazar aatā hai rauzan kā dhuāñ

aur dil kahtā hai ye dūd-e-dil-e-soḳhta hai

ek ghanghor sukūñ ek kaḌī tanhā.ī

merā andoḳhta hai

mujh ko kuchh fikr nahīñ aaj ye duniyā miT jaa.e

mujh ko kuchh fikr nahīñ aaj ye be-kār samāj

apnī pābandī se dam ghuT ke fasāna ban jaa.e

mirī āñkhoñ meñ to markūz hai rauzan kā samāñ

apnī hastī ko tabāhī se bachāne ke liye

maiñ isī rauzan-e-be-rañg meñ ghus jā.ūñgā

lekin aise to vahī but na kahīñ ban jā.ūñ

jo nigāhoñ se har ik baat kahe jaatā hai

chhoḌ kar jis ko sanam-ḳhāne kī mahjūb fazā

ghar ke bebāk alamnāk siyah-ḳhāne meñ

ārzūoñ pe sitam dekhnā hai ghulnā hai

maiñ to rauzan meñ nahīñ jā.ūñgā duniyā miT jaa.e

aur dam ghuT ke fasāna ban jaa.e

sañg-dil ḳhuun sukhātī huī be-kār samāj

maiñ to ik dhyān kī karvaT le kar

ishq ke tā.ir-e-āvāra kā bahrūp bharūñgā pal meñ

aur chalā jā.ūñgā us jañgal meñ

jis meñ tū chhoḌ ke ik qalb-e-fasurda ko akele chal dī

rāsta mujh ko nazar aa.e na aa.e phir kyā

an-ginat peḌoñ ke mīnāroñ ko

maiñ to chhūtā hī chalā jā.ūñgā

aur phir ḳhatm na hogī ye talāsh

justujū rauzan-e-dīvār kī marhūn nahīñ ho saktī

maiñ huuñ āzād mujhe fikr nahīñ hai koī

ek ghanghor sukūñ ek kaḌī tanhā.ī

mirā andoḳhta hai

raat ke aks-e-taKHayyul se mulaqat ho jis ka maqsud

kabhi darwaze se aata hai kabhi khiDki se

aur har bar nae bhes mein dar aata hai

us ko ek shaKHs samajhna to munasib hi nahin

wo tasawwur mein mere aks hai har shaKHs ka har insan ka

kabhi bhar leta hai ek bholi si mahbuba-e-nadan ka bahrup kabhi

ek chaalak jahan-dida o be-bak sitam-gar ban kar

dhoka dene ke liye aata hai bahkata hai

aur jab waqt guzar jae to chhup jata hai

meri aankhon mein magar chhaya hai baadal ban kar

ek diwar ka rauzan isi rauzan se nikal kar kirnen

meri aankhon se lipaTti hain machal uThti hain

aarzuen dil-e-gham-dida ke aasuda nihan-KHane se

aur main sochta hun nur ke is parde mein

kaun be-bak hai aur bholi si mahbuba kaun

soch ko rok hai diwar ki wo kaise chale

kaise ja pahunche kisi KHalwat-e-mahjub ke maKHmur sanam-KHane mein

wo sanam-KHana jahan baiThe hain do but KHamosh

aur nigahon se har ek baat kahe jate hain

zehn ko un ke dhundalke ne banaya hai ek aisa akkas

jo faqat apne hi man-mane manazir ko giraftar kare

main khaDa dekhta hun sochta hun jab donon

chhoD kar dil ke sanam-KHane ko ghar jaenge

sehn mein talKH haqiqat ko khaDa paenge

ek sochega meri jeb ye duniya ye samaj

ek dekhega wahan aur hi tayyari hai

mujh ko uljhan hai ye kyun main to nahin hun maujud

raat ki KHalwat-e-mahjub ke maKHmur sanam-KHane mein

meri aankhon ko nazar aata hai rauzan ka dhuan

aur dil kahta hai ye dud-e-dil-e-soKHta hai

ek ghanghor sukun ek kaDi tanhai

mera andoKHta hai

mujh ko kuchh fikr nahin aaj ye duniya miT jae

mujh ko kuchh fikr nahin aaj ye be-kar samaj

apni pabandi se dam ghuT ke fasana ban jae

meri aankhon mein to markuz hai rauzan ka saman

apni hasti ko tabahi se bachane ke liye

main isi rauzan-e-be-rang mein ghus jaunga

lekin aise to wahi but na kahin ban jaun

jo nigahon se har ek baat kahe jata hai

chhoD kar jis ko sanam-KHane ki mahjub faza

ghar ke bebak alamnak siyah-KHane mein

aarzuon pe sitam dekhna hai ghulna hai

main to rauzan mein nahin jaunga duniya miT jae

aur dam ghuT ke fasana ban jae

sang-dil KHun sukhati hui be-kar samaj

main to ek dhyan ki karwaT le kar

ishq ke tair-e-awara ka bahrup bharunga pal mein

aur chala jaunga us jangal mein

jis mein tu chhoD ke ek qalb-e-fasurda ko akele chal di

rasta mujh ko nazar aae na aae phir kya

an-ginat peDon ke minaron ko

main to chhuta hi chala jaunga

aur phir KHatm na hogi ye talash

justuju rauzan-e-diwar ki marhun nahin ho sakti

main hun aazad mujhe fikr nahin hai koi

ek ghanghor sukun ek kaDi tanhai

mera andoKHta hai