شام سمے

میں نے جب سے اپنے کمرے کی

بستر کے سامنے والی دیوار پر ٹنگی گھڑی اتاری ہے

تب سے اس دیوار پر آنکھیں اگنا شروع ہو گئی ہیں

گھڑی کے اندر

گول گول گھومتا وقت چکرا کر ٹھہر گیا تھا

اب دیوار پر اگی ان تمام آنکھوں میں

گھڑیاں بنی ہوئی ہیں

اور ہر گھڑی مختلف وقت پر رکی ہوئی ہے

لیکن آنکھوں کی بیل کے سائے میں پڑا

ڈریسنگ ٹیبل کا آئینہ بتاتا ہے

کہ وقت چل رہا ہے

تیز رفتاری سے

اتنی تیز رفتاری سے

کہ اکثر ہانپ جاتا ہے