sham

sūraj Duubā huā añdherā

chiḌiyāñ lene lagīñ baserā

din kā ġhā.eb huā ujālā

tārīkī ne parda Daalā

jalne lage diye ghar ghar meñ

girjā masjid aur mandar meñ

puujā meñ hai dhyān meñ koī

khāne ke sāmān meñ koī

charḳh-e-barīñ par chamke taare

be-roġhan haiñ raushan saare

halkā halkā nuur hai in kā

bastī se ghar duur hai in kā

bachche niiñd meñ ġhāfil ho ga.e

lorī sunte sunte so ga.e

jangal se ghar gvāle aa.e

revaḌ apnā sañbhāle aa.e

jā pahuñche mazdūr gharoñ meñ

ḳhush ḳhush haiñ biivī bachchoñ meñ

din bhar kab ārām liyā hai

ḳhuun pasīna ek kiyā hai

shaam ne dī hai kaam se fursat

dam lene kī milī hai mohlat

ab so.eñge lambī taane

mehnat lagegī ḳhuub Thikāne

manzil par rahrav jā pahuñche

haare thake niiñd ke maate

kisht-o-chaman sunsān paḌe haiñ

ḳhālī ab maidān paḌe haiñ

pahlā sā ġhul shor kahāñ hai

dauḌ dhuup kā zor kahāñ hai

mā.il-e-rāhat huā zamāna

ḳhatm huā din kā afsāna

chahal-pahal do-chār ghaḌī hai

sab ke sirhāne niiñd khaḌī hai

suraj Duba hua andhera

chiDiyan lene lagin basera

din ka ghaeb hua ujala

tariki ne parda Dala

jalne lage diye ghar ghar mein

girja masjid aur mandar mein

puja mein hai dhyan mein koi

khane ke saman mein koi

charKH-e-barin par chamke tare

be-roghan hain raushan sare

halka halka nur hai in ka

basti se ghar dur hai in ka

bachche nind mein ghafil ho gae

lori sunte sunte so gae

jangal se ghar gwale aae

rewaD apna sanbhaale aae

ja pahunche mazdur gharon mein

KHush KHush hain biwi bachchon mein

din bhar kab aaram liya hai

KHun pasina ek kiya hai

sham ne di hai kaam se fursat

dam lene ki mili hai mohlat

ab soenge lambi tane

mehnat lagegi KHub Thikane

manzil par rahraw ja pahunche

haare thake nind ke mate

kisht-o-chaman sunsan paDe hain

KHali ab maidan paDe hain

pahla sa ghul shor kahan hai

dauD dhup ka zor kahan hai

mail-e-rahat hua zamana

KHatm hua din ka afsana

chahal-pahal do-chaar ghaDi hai

sab ke sirhane nind khaDi hai